Савдо-саноат палатаси раиси Даврон Ваҳобов Афғонистон соғлиқни сақлаш вазири Мавлавий Нур Жалол Жалолий билан учрашув ўтказди. Бу ҳақда ССП матбуот хизмати хабар берди.
Учрашувда икки мамлакат ўртасида соғлиқни сақлаш соҳасидаги ҳамкорликни ривожлантириш, айниқса, фармацевтика ва стоматология йўналишларида қўшма лойиҳаларни амалга ошириш масалалари муҳокама қилинди.
Жумладан, Афғонистон томони афғон ёшларини ўзбекистонлик мутахассислар томонидан Термиз шаҳрида стоматология йўналиши бўйича ўқитишни, шунингдек, халқаро “Термиз савдо маркази” ҳудудида Афғонистондан келадиган фуқароларга тиббий хизмат кўрсатиш мақсадида 20 га яқин стоматология клиникаси филиалларини очишни таклиф қилди.
Фармацевтика соҳасидаги ҳамкорлик бўйича эса долзарб масалалар кўриб чиқилди. Хусусан, тадбиркорлар томонидан Афғонистонда дори-дармон воситаларини рўйхатдан ўтказиш муддати олти ойдан бир ойга қисқартирилиши, шунингдек, бир марта импорт қилишга рухсат бериш тартиби жорий этиш таклифлари илгари сурилди. Афғонистон соғлиқни сақлаш вазири ушбу ташаббусларни қўллаб-қувватлади.
Ушбу шароитлар, маҳсулот сифати ва рақобатбардош нархлар билан биргаликда, Ўзбекистон фармацевтика компаниялари учун Афғонистон бозоридаги улкан салоҳиятни рўёбга чиқариш имконини яратади. 2025 йил охиригача экспорт ҳажмини 50 млн доллардан оширишга барча асослар мавжуд.
Наврўз байрами ҳамда Рамазон ҳайити муносабати билан Ўзбекистондан афғон халқига қарийб 200 тоннадан ортиқ озиқ-овқат маҳсулотлари ортилган навбатдаги инсонпарварлик ёрдами етказилган эди.
Шунингдек, ўтган йилнинг декабрь ойида президент Шавкат Мирзиёевнинг топшириғи билан, Афғонистон аҳолисига инсонпарварлик ёрдами ва “Саломатлик” поезди жўнатилганди.
Апрель ойида Сурхондарё вилояти ҳокими Улуғбек Қосимов бошчилигидаги делегация Ўзбекистон халқи номидан биродар афғон халқига навбатдаги инсонпарварлик ёрдамини етказган эди.
Шунингдек, 2023 йил апрелда ҳам Ўзбекистондан афғон халқига 185 тоннадан ортиқ зарурий озиқ-овқат маҳсулотлари ортилган навбатдаги инсонпарварлик ёрдамини жўнатганди.
2022 йилда бўлса зилзила оқибатида жабр кўрганларга ёрдам кўрсатиш мақсадида Ўзбекистон президенти Шавкат Мирзиёев топшириғига биноан Афғонистонга навбатдаги инсонпарварлик ёрдами юборилган эди.
Изоҳ (0)