Ижтимоий тармоқларда киприк эктириш оқибатида кўзидан айрилган аёлнинг видеоси тарқалди. Унда айтилишича, киприк эктириш жараёнида ишлатилган елим ножўя таъсир кўрсатган. Кўз атрофи шишиб, қичишиш ва қуруқлик кузатилган. Аёл шифокорга бориб кўринганида қорачиқ қуриб қолгани ва кўзни қайта тиклаб бўлмаслиги айтилган. Аёлнинг бир кўзи олиб ташланиб, ўрнига ясама кўз қўйилган.
Сунъий киприк эктириш ва бунинг кўзга қанчалик таъсир қилиши бўйича офталмолог
“Дарё”га тушунтириш берди.
Сунъий киприкдан уч касаллик
Аёлларимиз ҳар доим, ҳар замонда чиройли бўлиб юришни хоҳлашади. Беморларимиз орасида ҳатто операцияга катта-катта киприкларини қўйиб келиш ҳолатлари кузатилади. Бу жарроҳлик амалиётига халал беради, албатта.
Баъзида киприк экканда уни елим билан қўяди. Бунда кўзга реакция берган ҳолатларига гувоҳ бўляпмиз. Ҳатто кўз ичига елим кириб кетган вазиятларда кўзни тозалаганмиз. Бундан ташқари, кўзда шамоллаш келтириб чиқарган, йиринглаш учраб турибди.
Агар вақтида даволанса, бу касалликдан тез тузалиш мумкин. Лекин аксар беморларимиз иш кўплигидан ёки бошқа сабабдан шифокорга кеч мурожаат қилишади. Оқибатда кўз ёшланиб юриб, ёмон асоратларга олиб келади.
Киприк атрофида ёғ безлари бўлади. Унга сунъий киприк экиш даврида соғлом одамга инфекция юқиши мумкин. Бу безлар тез шамоллайди ва кўз шишиб кетиб, оғриқларга сабаб бўлади.
Кўзни ойнасига қовоқлар тегиб туради ва оқибатда кератит касаллигини келтириб чиқаради. Кўзнинг ички томонидаги шиллиқ қаватида эса конюктивит касаллигига олиб келади. Демак бирдагина кўзда ва унинг атрофида 3 та касаллик ривожланади: кератит яъни шох парда касаллиги, конюктивит — шиллиқ парда касаллиги ҳамда терида дерматит. Бу уч касаллик секин асталик билан “кўз ойнасини ейди”. Ойна хиралашиб-хиралашиб, кейинчалик кўзни ичига инфекция ўтишига олиб келади. Кўзни ичига ўтганидан кейин уни даволаш ўта қийин кечади. Оқибатда эндофталмит, панофталмит каби оғир касалликларга олиб келади ва кўзни олиб ташлашгача бориши мумкин.
Яна бир хавф
Киприк экишда кузатиладиган шамоллаш касаллигидан ташқари, кўзда қуруқлик синдроми ҳам келиб чиқиш хавфи мавжуд. Қовоқлардаги безлар кўзни намлаб туради. Агар биз киприк қўйиб, буни озуқаланишини бузсак кўзда намланиш хусусияти йўқолади. Секин-асталик билан кўзнинг шох пардаси қуруқлашиб қолади. Бу кўзга доимий равишда намлантирадиган дори томизиб юришга олиб келади.
Шифокор кўригидан ўтинг!
Кўзга киприк экканидан кейин кўз шифокори кўригидан ўтиб қўйишни тавсия қилардим. Чунки ўтказилган амалиёт кўзга қанчалик таъсир қилганини текширтириш фойдадан ҳоли бўлмайди. Мисол учун, аввал бошида киприк атрофи қизариб туради, лекин бунга кўпчилик аёллар аҳамият бермайди. Вақтида қилинган муолажа келажакда кўзингиздаги кузатилиши мумкин бўлган оғир асоратлардан асрайди.
Юқоридагилардан келиб чиқиб кўзга киприк қўйдиришда иккита касаллик: шамоллаш ва кўзда қуруқлик синдроми хавфини унутмаслик керак.
Изоҳ (0)