Юрак саломатлиги кўп жиҳатдан турмуш тарзига боғлиқ ва овқатланиш бу борада муҳим рол ўйнайди. Баъзи маҳсулотлар томирларни мустаҳкамлашга ва юрак-қон томир тизимининг нормал ишлашини қўллаб-қувватлашга ёрдам беради, бошқалари эса аксинча, унга зарар етказади. Қуйида кардиолог мутахассислар томонидан тавсия этиладиган юрак учун фойдали маҳсулотлар ҳақида маълумот берамиз.
Гипертония, юрак хуружи ва бошқа юрак касалликлари хавфини камайтириш учун Ўрта Ер денгизи парҳези ёки DASH диетасига амал қилиш керак. DASH (Dietary Approaches to Stop Hypertension) парҳези — бу юқори қон босимини пасайтириш ва юрак-қон томир касалликларининг олдини олиш учун мўлжалланган махсус овқатланиш режаси. DASH диетаси соғлом овқатланишга асосланган бўлиб, кўпроқ сабзавотлар, мевалар, ёғсиз сут маҳсулотлари, бутун донлар, ёнғоқлар ва ёғли балиқни ўз ичига олади. Бу диета қондаги холестерин даражасини пасайтиради ва яллиғланиш жараёнларини камайтиради.
Қайси маҳсулотларни рационга киритиш керак?
Авокадо
Авокадо моно тўйинмаган ёғлар манбаи бўлиб, улар зарарли холестерин даражасини пасайтиради. Ундаги калий юрак ритмини қўллаб-қувватлайди. Тавсия этилган порция — ҳар куни ёки ҳар икки кунда бир марта яримта авокадо.
Ёғли балиқ
Ёғли балиқ (лосос, сардина, тунец, скумбрия, селд) да омега-3 мавжуд. Улар яллиғланиш жараёнларини камайтиришга ёрдам беради. Ёғли балиқни рационга қўшиш юрак-қон томир касалликлари хавфини 30-35% га камайтиради. омега-3 организмга етарли миқдорга кириши учун ҳафтада 2-3 марта балиқ истеъмол қилиш тавсия этилади.
Кўкатлар ва яшил сабзавотлар
Япроқли сабзавотлар (исмалоқ, салат барги, руккола) калийга бой бўлиб, нерв тизими, мушаклар саломатлигини қўллаб-қувватлайди ва қон босимини нормал ҳолатга келтиради. Ҳар куни 1-2 япроқ сабзавотлар истеъмол қилиш юрак-қон томир касалликларини олдини олиш учун етарлидир.
Сули ёрмаси
Сули ёрмаси ва бошқа бутун донли маҳсулотларида кўплаб эрувчи толалар ва бета-глуканлар мавжуд. Улар холестерин даражасини пасайтиради ва қондаги шакар миқдорини нормал даражада сақлашга ёрдам беради. Натижада қандли диабетнинг олди олинади ва атеросклероз хавфи камаяди.
Зайтун ёғи
Зайтун мойида фойдали ёғлар мавжуд бўлиб, улар ҳам холестерин даражасини камайтиради. Шунингдек, зайтун атеросклерозни олдини олади. Уни салатлар ва тайёр таомлар учун қўшимча сифатида фойдаланиш тавсия этилади. Бироқ зайтун ёғини қовуриш учун ишлатмаслик керак, чунки юқори ҳароратда унинг фойдали хусусиятлари йўқолади.
Ёнғоқлар
Бодом, хандон писта ва грек ёнғоқлари холестерин даражасини камайтиради ва липид профилига ижобий таъсир қилади. Улардаги магний томирларни бўшаштиради ва қон яхши айланишини таъминлайди. Илмий маълумотларга кўра, рационида ёнғоқ бўлган шахсларда инфаркт хавфи бир неча баробар камаяди. Тавсия этилган миқдор — кунига бир ҳовуч ёнғоқ (тахминан 20-30 грамм).
Қора шоколад
Қора шоколад қандли диабетга чалинмаганлар учун мос келади. Муҳими — шоколаддаги какао миқдори 70% ва ундан юқори миқдорда бўлиши керак. Қора шоколад флавоноидларга бой бўлиб, томирларни кенгайтиради, инсулин резистентликни яхшилайди ва диабетнинг олдини олади.
Резавор мевалар
Агар резаворларга аллергия бўлмаса, рационга албатта уларни ҳам киритиш керак. Қулупнай, малина, қорағат каби мевалар томирларни шикастланишдан ҳимоя қилувчи антиоксидантлар билан бой. Улар капиллярларни мустаҳкамлайди ва яллиғланишларни камайтиради. Ҳар куни ёки ҳар икки кунда бир марта 100 грамм янги узилган ёки музлатилган резавор истеъмол қилиш тавсия этилади.
Изоҳ (0)