Ўзбек кино оламидаги айрим актриса ва актёрлар чет эл кинофильмлари, сериалларида суратга тушган. Қуйида шу каби фильм ва сериаллар келтирилади.
Шаҳзода Матчонова ва Ситора Фармонова «Ётоқхона» сериали
Ўзбек актрисалари орасида чет эл сериалларида иштирок этган актрисалар ҳам бор. Қирғизистон киноижодкорлари томонидан 2013 йилда суратга олинган «Ётоқхона» сериалида рол ижро этган Шаҳзода Матчонова ва Ситора Фармонова айнан шунга мисолдир. Сериалда Қирғизистоннинг машҳур актёрларидан Саломат Алиев, Нурбек Савитхонов, Элдияр Кененсаров рол ўйнаган. Сериал талаба қиз Тахминанинг севги ҳикояси ва бир қанча мавзуларни ўз ичига олади. Унда математика соҳасида яхши билимга эга бўлган Азамат пойтахтга келган вилоятликларни ҳимоя қилади. Иродали ва гўзал Меерим сирли ўтмиш ва ўз характери билан билан курашади. Сериалда реал ҳаёт барча юзага келадиган муаммолар — турмуш даражаси, коррупция, этник муаммолар кўрсатилади. Ўзбек актрисалари ижросидаги сериал шу каби воқеаларни ўз ичига олади.
Бобур Йўлдошев «Амирнинг ўғли Иван» кинокартинаси
Россия киноижодкорлари томонидан 2014 йилда ишланган «Амирнинг ўғли Иван» кинокартинасида таниқли ўзбек актёри Бобур Йўлдошев рол ижро этган. Фильмда Россиянинг таниқли киноактёрлари Каролина Грушка, Дмитрий Дюджев, Андрей Мерзликин ҳам иштирок этган. Фильмда севастополлик ёш аёл урушдан қочиб, болалари билан ўзбек қишлоғида қолади ва у ерда тирик қолиш учун оддий ишчига турмушга чиқишга рози бўлади. Орадан вақт ўтиб у яна бир фарзандни дунёга келтиради. Учинчи хотин бўлишга рози бўлган аёл денгизчилик билан шуғулланган турмуш ўртоғининг тириклигига ишонади, вақт ўтиб унинг биринчи турмуш ўртоғи қайтиб келади.
Алихан «Сумерки» кинофильми
Ўзбек кино оламида ўз ўрнига эга бўлган актёр Алихан 2009—2010 йилда АҚШда суратга олинган «Сумерки» кинофильмида рол ижро этган. Актёр бу фильм орқали кунига 250 доллардан 750 долларгача маблағ топганини айтган. Ушбу фильм 18 ёшни энди қаршилаган Белланинг ҳаётида содир бўлган воқеаларни ўз ичига олади. Уни ёқтириб қолган Эдвард Каллен эса қизни вампирлардан ҳимоя қилиш учун Белла билан муносабатларини тугатишга қарор қилади. Тўрт ой тушкунликдан қутила олмаган қизнинг ҳаётига янги инсонлар кириб келади ва у барчасини унута бошлайди. Вампирлар билан кураш олиб борган қаҳрамоннинг муносабатларда умуман омади келмайди. Фильм охирида Белла дўсти билан Италияга боради ва ўша ерда муваффаққиятга эришади.
Ёқуб Аҳмедов, Зикир Муҳаммаджонов, Ражаб Адашев «Али бобо ва қирқ қароқчи» фильми
Ҳиндистон киноижодкорлари томонидан 1979 йилда суратга олинган «Али бобо ва қирқ қароқчи» фильмида учта ўзбек актёри: Ёқуб Аҳмедов, Зикир Муҳаммаджонов, Ражаб Адашев иштирок этган. Фильм намойиш этилганидан сўнг катта муваффаққиятга эришди. Унда Ҳиндистоннинг машҳур жуфтликларидан бири Ҳема Малини, Дҳармендра ва бошқа кўплаб машурлар рол ижро этган. Миллионлаб томошабинларнинг қалбидан жой эгаллаган кинофильм қуйидаги воқеалардан иборат: қадимий шаҳар Гулободда акаси Қосим ва онаси билан яшаётган Алибобо исмли йигит шаҳарга кириб келган савдогарларни тунайдиган 40 қароқчига қарши курашади ва бунинг натижасида жуда кўп саргузаштларга дуч келади. Ҳиндистон шоҳининг қизи Маржонани ёқтириб қолган Алибобо бундан анча вақт олдин даракциз бўлиб кетган отасини топади ва қароқчилар яширинган сирли ғорнинг тилсимини билиб олади. У Гулобод шаҳрини золим ҳокимдан озод қилади. Бироқ бу йўлда бойлик йўлида ҳеч нарсадан тоймайдиган акасини йўқотади. Кинофильм якунида сувсиз қолган Гулобод аҳолиси яна сувга эга бўлади ва шаҳарга Алибобони ҳоким қилади.
Фурқат Файзиев «Висоцкий, тириклигинг учун раҳмат», «Платина» фильмлари
«Юлдузингни бер осмон» фильми орқали кўплаб мухлисларга таниш бўлган актёр Фурқат Файзиев 2011 йилда Россия киноижодкорлари томонидан суратга олинган «Висоцкий, тириклигинг учун раҳмат» кинокартинасида ва 2007 йилда намойиш этилган «Платина» фильмларида рол ижро этган. Ушбу фильм афсонавий театр ва кино актёри, трибуна ва шоир Владимир Висоцкий ҳаётининг беш кунида кечган реал воқеаларни ўз ичига олади. Фильмдаги воқеалар 1979 йилнинг ёзида, Висоцкийнинг бевақт вафотидан бир йил олдин, Бухорода Ўзбекистон бўйлаб гастрол сафари чоғида содир бўлади. У ҳаёт ва ўлим ёқасида мувозанатни сақлайди: Висоцкий юрак хуружи сабабли у клиник ўлимни бошдан кечиради.
Алишер Узоқов «Застава» сериали
Алишер Узоқов ҳам Россия киноижодкорлари томонидан 2007 йилда ишланган «Застава» сериалида бош қаҳрамонлардан бирини ижро этган. Ушбу сериалга суратга тушгандан кейин актёр 40 дан ортиқ кинофильмларда иштирок этган. Актёр ижросидаги «Жаноб ҳеч ким», «Тундан тонггача», «Севги фариштаси», «Уйланиш» фильмлари томошабинлар қалбидан жой эгаллаган. «Застава» сериали гиёҳванд моддалар савдоси йўлига тўсқинлик қилган, ўз ҳаётини хавф остига қўйган ҳарбийларнинг жасорати, ўз ватанининг чегараларини ҳимоя қилиш ҳаётнинг бир қисмига айланганлар ҳақида. Фильм тожик-афғон чегарасида содир бўлган реал воқеаларга асосланган. Россия чегарачилари 2004 йилда рус қўшинлари у ердан олиб чиқилгунга қадар бу чегарани юз йилдан кўпроқ вақт давомида қўриқлади. Бу вақт ичида чегара постларига кўплаб ҳужумлар уюштирилди. Масалан, 1993 йилда 45 чегарачи уларни қуршаб олган 250 нафар мужоҳир билан жангга кирди, унда 25 нафар чегара ҳимоячиси ҳалок бўлган, 11 соат давом этган, бироқ жангарилар постни эгаллашга улгурмаган. 1994 йилда худди шу постда 18 нафар чегарачи сўнгги технологиялар билан қуролланган 60 нафар террорчига қарши турди ва қўшимча кучлар келгунига қадар уч соатдан кўпроқ вақт давомида ҳужумни қайтарди.
Сейдулла Молдаханов «Юлдузлар», «Ғалаба куни», «Геолог: Ўлимдан кучлироқ»
Сейдулла Молдаханов бир нечта чет эл фильмларида суратга тушган. Актёр Россия киноижодкорлари томонидан суратга олинган «Юлдузлар», «Ғалаба куни», «Геолог: Ўлимдан кучлироқ» фильмларида суратга тушган. Сейдулла Молдаханов театрда ҳам фаолият юритган. «Геолог: Ўлимдан кучлироқ» кинокартинасидаги воқеалар ўтган асрнинг 60 йилларида Россияда содир бўлади. Кинофильмда геология факультетининг икки нафар битирувчиси Тошкентдан Новосибирскка амалиёт ўташ учун боради. Чет элдаги ҳаётга кўникмаган талабалар маҳаллий қароқчиларда дуч келади, отишмалардан омон қолади ва бўрилар бўлган ўрмонда тунаб қолади. Улар астойдил тирик қолишга ва вазиятлардан чиқиб кетишга ҳаракат қилади.
Нозим Тўлахўжаев «Осмон ва ер»
Фаолияти давомида 40 дан ортиқ кинофильмларда суратга тушган Нозим Тўлахўжаев 2003 йилда Россия ва Белоруссия киноижодкорлари томонидан суратга олинган «Осмон ва ер» сериалида, Япония кинорежиссёрлари намойиш этган, 1997 йилда экранларга чиққан «Мен хоҳлайман» кинокартинасида рол ижро этган. Сериалдаги воқеалар маҳаллий аэропорт ходимлари: учувчилар, стюардессалар, божхона ходимларининг бир муддатлик ҳаёти ҳақида. Ҳар бир қаҳрамоннинг шахсий ҳаётида етарлича муаммолар борлиги кўрсатилган сериалда йўловчи самолётининг двигатели ёниб кетади, кейинроқ парвоз вақтида таҳдидлар ёзилган ёзувлар топилади. Кескин воқеаларни ўз ичига олган «Осмон ва ер» сериалида стюардесса Марина ва унинг турмуш ўртоғи, учувчи Виктор Шведов самолёт бортида юзага келган ваҳимали ҳолатни тинчлантиришга ҳаракат қилади.
Жавоҳир Зокиров «Май ойининг етти куни» фильми
Ўзбек кино оламида энг кўп гонорар оладиган актёрлардан бири Жавоҳир Зокиров 2011 йилда Қозоғистон ва Россия ҳамкорлигида суратга олинган режиссёр Эрмек Турсуновнинг «Май ойининг етти куни» фильмида бош роллардан бири «Хасан» образини гавдалантирган. Фильмда Жавоҳир Зокиров билан биргаликда машҳур актриса Евгения Лоза ва актёрлар Владимир Яглич, Сергей Угрюмов рол ижро этган. Кинокартинанинг қисқача ифодаси қуйидагича: 2001 йилнинг май ойида Олмаотадаги тижорат банкларининг бирида катта ўғрилик амалга оширилади. Олмаотадаги Америка элчихонасидан 50 метр узоқликда содир бўлган ушбу ҳужумда бир неча киши ҳалок бўлади. Жиноятчилар 700 минг доллар миқдоридаги пулни қўлга киритишга муваффақ бўлади, шундан сўнг пойтахтдаги валюта айирбошлаш шахобчалари ва ташкилотларда бир қатор рейдлар ўтказилади. Бунинг натижасида жиноят жуда тез очиқланади, бироқ у шаҳар аҳолисининг ҳам, ҳуқуқ-тартибот идоралари ходимларининг ҳам хотирасида узоқ вақт сақланиб қолади. Ушбу кинофильмда Мухлисов тўдасининг амалга оширган бир қанча жиноятларини ҳам кўриш мумкин.
Мавзуга доир: Каан Урганжиўғли, Сатоко Акио, Павел Прилучний ва ўзбек фильмларида суратга тушган бошқа хорижий актёрлар (фото, видео)
Изоҳ (0)