“Ўзим иштирок этган кадрларни кўролмайман”: Ўйнаган ролларидан қаттиқ афсусланган актёр ва актрисалар (фото)

Баъзида актёрлар ва актрисалар маълум бир ролни ўйнаганларидан афсусланишади. Айримлар ўз ижросидан норози бўлса, бошқасига сценарий ёки режиссёрнинг иш услуби ёқмайди, учинчиси у иштирокидаги фильм студияга зарар келтирганидан хафа.

Роберт Паттинсон (“Сумерки”)

Роберт Паттинсон интервьюларидан бирида “Сумерки”нинг ғалати воқеаларидан нафратланишини бир неча бор таъкидлаган. Бу сўзлари учун уни лойиҳадан ҳайдаб юборишларига сал қолади. Ўсмир вампир Эдвард Калленни ўйнаш унга қийин бўлган. 2011 йилда берган интервьюсида Паттинсон шундай деган эди: “Бу фильмнинг бир қисми бўлиш, сизга ёқмайдиган нарсани ўйнаш жуда ғалати”.

Алек Гиннес (“Юлдузлар жанги”)

Алек Гиннес кўпчилик томошабинларга “Юлдузлар жанги” фильмидаги Жеди Оби-Ван Кеноби роли билан таниш. Гарчи у актёрга катта бойлик келтирган бўлса-да, миш-мишларга кўра, у бу ролни ёқтирмаган. Фильмдаги диалоглар актёрга ёқмайди, улар маъносиз туюлади. Шунинг учун Жорж Лукас Гиннесни ҳар бир эпизодда рол ўйнашга кўндириш учун кўп ҳаракат қилишга тўғри келади.

Жорж Клуни (“Бетмен ва Робин”)

Актёрлик ютуқлари ва режиссёрлик фаолияти билан танилган Жорж Клуни ҳам карьерасида афсусланадиган роллари борлигини тан олади. Масалан, “Бетмен ва Робин” фильмидаги Бетмен образи масхара объектига айланади.

“Бетмен ролини ўйнаб, омадсизликка учрадим. Фильм чинданам ёмон эди. Аммо бу муваффақиятсизликдан сабоқ олдим: ишимни қайта кўриб чиқишга мажбур бўлдим. Чунки ҳозир мен шунчаки рол бериладиган актёр эмасман”.

Кетрин Хейгл (“Эҳтирос анатомияси”)

Кетрин Хейгл “Эҳтирос анатомияси”да Иззи Стивенс роли билан машҳур. 2008 йилда актриса сериал ижодкорларидан норозилигини билдиради. Кетриннинг таъкидлашича, ёзувчилар унинг қаҳрамонини Иззи қила олмайдиган нарсаларни қилишга мажбурлаган.

Хейгл, шунингдек, “Эмми” мукофоти учун даъвогарлар рўйхатидан исмини чиқариб ташлайди. Бу сериал ижодкорларини хавотирга солади. Улар Хейглни актёрлар ва ижодий жамоага ҳурматсизлик қилганликда айблашади — актриса сериалдан ҳайдалади. Шу сабабли 6-мавсумдан кейин томошабинлар доктор Иззи Стивенсни бошқа кўрмайди.

Шелли Дювалл (“Ёғду”)

Стенли Кубрик кино тарихидаги энг буюк режиссёрлардан бири ҳисобланади. У перфексионист бўлиб, кўпинча актёрларни энг яхши ижрога эришиши учун ҳолдан тойгунча ишлатади.

Актриса Шелли Дювалл учун катта психологик синов “Ёғду” даҳшатли фильмидаги иштироки эди. Тасвирга олиш режалаштирилган 17 ҳафта ўрнига бир йилдан ортиқ давом этади. Режиссёр актрисани аямайди: у актриса қаҳрамонининг эри Жекнинг ақлдан озганини кўриб, бошдан кечирган даҳшатни ҳис қилишини хоҳлайди. Ўшанда Шелли шунчалик стрессга тушганидан сочлари тўкила бошлаган.

“Бу Кубрик билан ишлаш имкониятим эди. Лекин чидаб бўлмас даражадаги машаққат эди. Кундан кунга ишим оғирлашарди. Фильм экранларга чиққандан кейин эса ҳеч ким ундаги ижромни қадрламади, ҳатто тилга ҳам олишмади. Барча мақтовлар Кубрикники бўлди, гўё мен у ерда умуман бўлмаганман”, — дейди актриса.

Жессика Альба (“Фантастик тўртлик”)

Жессика Альба 2000 йилларнинг ўрталарида “Фантастик тўртлик” фильмида Кўринмас аёл ролини ўйнаганида суперқаҳрамонлар ролини ижро этган биринчи актрисалардан бири эди. Бироқ бу тажриба муваффақиятсиз тугайди — фильмдан кейин Альба бир муддат актрисалик фаолиятини якунлайди.

“Мен бу фильмни ёмон кўрардим. Эсимда, мен Силвер Сурферда ўлаётганимда, режиссёр менга шундай деганди: “Сен касалга ўхшаб кўриняпсан. Йиғлаганда гўзалроқ бўла оласанми? Чиройли йиғла, Жессика!”.

“Ҳақиқатан ҳам шунчалик аҳмоқманми? Менинг инстинктларим ва ҳис-туйғуларим етарли эмасми? Ўшанда ўзимга ўзим: “Ҳаммасига минг лаънат. Энди мени кинобизнес қизиқтирмайди”, деганман”, — дея қўшимча қилади Жессика.

Крис Хемсворт (“Тор 2: Зулмат шоҳи”)

“Тор-2” Marvel оламидаги энг ёмон фильмлардан бири ҳисобланади. Шу сабабли бош актёр Крис Хемсворт ҳам фильм ва қаҳрамонига иштиёқи йўқлиги ажабланарли эмас. Интервьюда Крис шундай дейди:

“Тор-2 да қилган ишларимдан бир оз ҳафсалам пир бўлди. Қаҳрамонимни ўсган деб ўйламайман — томошабинларга кутилмаган ва ғайриоддий нарса кўрсата олмадим”.

Кейт Уинслет (“Титаник”)

Ажабланарлиси шундаки, Кейт Уинслет уни дунёга машҳур юлдузга айлантирган фильмдаги ижросидан норози. Интервьюларининг бирида актриса “Титаник”даги ўзи иштирок этган кадрларни томоша қила олмаслигини айтади:

“Ҳар сафар ўзим бор саҳналарни томоша қилганимда: Ростанми? Шундай ўйнаганманми? Худойимей, дейман. Американча аксентим эса... Мен буни эшита олмайман. Бу даҳшат”, — дейди Кейт.