Ҳинд актрисалари Вижаянтимала ва Шридеви ўртасида қандай ўхшашликлар бор?

30 йил вақт билан 13 августда Ҳиндистоннинг жанубида таваллуд топган актрисалар Вижаянтимала ва Шридевининг карьерасида ажойиб ўхшашликлар бор.

Шридеви 1963 йил Минампаттида, Вижаянтимала эса Трипликанда дунёга келган. Ҳар иккала актриса ҳам киносаноатда болалигидан суратга туша бошлаган.

Вижаянтимала 13 ёшида «Ҳаёт» фильмида роль ижро қилган. Шридеви «Thunaivan» фильмида суратга тушганида 4 ёшда бўлган. Дебютидан икки йил ўтиб Вижаянтимала ижросидаги ҳинд фильми — «Баҳор» экран юзини кўрган. Унинг муваффақиятидан кейин мамлакат жанубидаги бошқа актрисаларга Болливудда йўл очилган.

Шридевининг ҳинд киносаноатидаги илк киноси тамил фильми «Ўн олти ёшда»нинг ремейки Solva Sawan бўлган. Фильм экран юзини кўрганида унинг ёши 16 да бўлган. Аввалроқ «Жули»(1975) фильмида бош қаҳрамоннинг синглисини гавдалантирган.

Иккала актриса ҳам илон ҳақидаги машҳур фильмларда суратга тушган. Вижаянтимала «Nagin» мусиқий фильмида рақиб қабила вакилининг ўғлига кўнгил қўйган сардорнинг қизи сифатида кўриниш берган.

Шридеви эса 1986 йилда «Naginа / Сеҳрли олмос» фильмида қайлиғининг қасосини олиш учун одамга айланадиган илон — Ражни ролини ижро қилган. 1986 йилда фильмнинг иккинчи қисми «Сеҳрли олмос. Иккинчи фильм» тақдим қилинган.

Иккала актриса ҳам рақсга тушиш борасида ўз ишининг устаси бўлган. Вижаянтимала «Амрапали» (1966) фильмида профессионал даражада рақсга тушган бўлса, Шридеви 1989 йилда суратга олинган «Чандни» фильмида ўз ижроси билан оммани лол қолдирган.