Машҳурлик, бойлик, бутун дунё бўйлаб миллионлаб мухлисларга эга бўлиш, ҳашаматли ҳаёт ва ҳар қандай истакни амалга ошириш…Таниқли актрисаларнинг ҳаётини кўпчилик айнан шундай тарзда тасаввур қилади. Аммо экранда порлаб турган юлдузнинг реал ҳаёти ортида кўп машаққатлар бўлади. Барча инсонлар каби ҳаёти доим ҳам осон ва ҳашаматли бўлмаган уч нафар турк актрисалари ҳақида суҳбат қурамиз.
Мелиса Дўнгел
Мелиса Дўнгел 1999 йил 18 сентябрда Истанбулда туғилган. “Қалбим эшигини қоқ” сериалидаги Жерен образини ижро этган Мелиса Донгел турк киносини муваффақиятли забт этди. Унинг отаси турк, онаси славян бўлиб, Дўнгел рус маданиятига бўлган муҳаббатини доим намоён қилган. У “Эшигимни қоқ” сериалидаги ролидан сўнг “Севги. Онг. Қасос”, “Дунё ва менинг ўртамда”, “Севги тактикаси-2” каби лойиҳаларда бош ролларни ижро этган.
Мелиса ҳеч қачон болалиги ҳақида гапиришни ёқтирмас эди, фақат вақти-вақти билан уларнинг уйида рус халқи миллий таомлари кўп тайёрланиши ва айниқса оливе салатини яхши кўришини айтган эди. Узоқ вақт давомида Дўнгелнинг мухлислари унинг қандай болаликни бошдан кечирганини билишмаган.
2021 йилда Мелиса 15 ёшидан бери отаси томонидан мунтазам равишда таҳқирлангани ва жинсий тажовузга учрагани ҳақидаги баёноти билан жамоатчиликни ҳайратда қолдирди. Актрисанинг онаси бу ҳақда доим билган, лекин қизи шунчаки ёлғон гапираётганига барчани ишонтирган. Вояга етгач, Дўнгел отасининг устидан полицияга шикоят қилди ва терговдан сўнг, айбланувчи узоқ муддатга қамоқ жазосига ҳукм қилинди.
Бундан тўрт йил аввал эса актриса ўзининг Элиф исмли синглисига васийлик қилиш учун учун ариза берди. Бу вақтга келиб, Мелисанинг онаси Наталя Орлова Севастополга кўчиб кетди ва ихтиёрий равишда ота-оналик ҳуқуқидан воз кечди. Аёл бу қилмишини қизларини ёлғиз тарбиялашнинг иложи йўқлиги билан изоҳлади.\
Бугунги кунда Мелиса Дўнгел шахсий ҳаётини очиқламайди. Актриса ҳали турмушга чиқмаган.
Неслиҳан Атагул
Неслиҳан Атагул 1992 йил 20 августда Истанбулда туғилган, лекин уни ҳақиқий турк аёли дейиш бир оз нотўғри. Актрисанинг онаси белорус, отаси эса черкас. Кўпчилик қон аралашганлиги сабабли Атагулнинг шундай жозибали кўринишга эга деб ҳисоблайди. У оилада иккинчи фарзанд бўлиб, ҳозирда акаси ҳамда онаси билан алоқаларни узган. Аммо турмуш қуришдан аввал ва турмушнинг биринчи йилларида актриса онасининг ҳаётидаги энг яқин ва энг яхши дўсти эканлигини бир неча бор таъкидлаган эди.
2012 йилда “Истанбулнинг икки юзи” сериалининг суратга олиш майдончасида актриса сюжетга кўра қаҳрамони ошиқ бўлган Кадир Дўғулу билан танишади. Натижада ҳақиқий ҳаётда ҳам актёрлар бир-бирига нисбатан нозик ҳис-туйғуларни бошдан кечиради. Тўрт йил ўтгач, актёрлар турмуш қуришди, аммо кейинги бир неча йил давомида Неслиҳаннинг ҳаёти айрим турк мухбирлари ва мухлислар туфайли дўзахга айланди.
Оммавий ахборот воситаларида Дўғулунинг тақиқланган диний секталарга аъзо эканлиги ва кўпхотинлилиги иддао қилинди. Гўёки у турмуш ўртоғи Неслиҳанни мунтазам равишда алдаши, уни кўплаб муваффақиятли лойиҳаларда иштирок этишини тақиқлаб қўйгани, дўстлари ва ҳамкасбларидан ажратиб қўйгани ва аёлининг ҳар бир қадамини назорат қилиши ҳақида маълумотлар пайдо бўла бошлади.
Сўнгги воқеалар фонида турк оммавий ахборот воситаларида Кадир Дўғулунинг “Севги таърифи” сериалидаги ҳамкасби Серра Аритурк билан бирга тушган видеоси эълон қилинди. Машҳурларнинг ёнма-ён ўтиргани акс этган видео жамоатчилик орасида резонанс пайдо бўлишига сабаб бўлди.
Шундан кейин ОАВ вакиллари Серра, Кадир ва Неслиҳандан изоҳ олишга уринган, аммо актрисалар жавоб беришдан бош тортган. Актёр эса Неслиҳан ҳақидаги саволга қуйидагича жавоб берган: “Ҳаммаси яхши, Неслиҳан уйда. Тонгда мен учун ажойиб нонушта тайёрлади, бизда ҳаммаси жойида”.
Шундан бери Неслиҳандан унинг шахсий ҳаёти ҳақида сўралганда, у қисқача: “Ҳаммаси ажойиб!” деб жавоб беради. Аммо актрисанинг мухлислари Кадир шунчаки рафиқасини ўз қоидалари билан яшашга мажбур қилганида айблашди.
Шунга ўхшаш хабарлар Туркия ижтимоий тармоқларида доимий равишда пайдо бўлади, аммо юлдузли жуфтлик буни ҳеч қачон тасдиқламайди.
Небаҳат Чеҳре
“Муҳташам юз йил” сериалида Айше Ҳафса — султон волидаси ролини ижро этган 80 ёшли турк актрисаси улуғ ёшга етса ҳам доимо гўзал кўринишда. 1962 йилда дебют қилган актриса фаолияти давомида юзлаб муваффақиятли лойиҳаларда иштирок этишга муваффақ бўлди. Турк актрисаси иштирокидаги энг машҳур лойиҳалар ичида “Тақиқланган севги”, “Муҳташам юз йил”, “Июнь кечаси” кабилар ажралиб туради.
Чеҳре номи турк киносининг барча мухлисларига яхши маълум бўлса-да, бундай машҳурлик учун актриса жуда катта бадал тўлашга мажбур бўлган.
15 ёшида Небаҳат ўгай отаси билан чиқиша олмагани учун уйини тарк этди. Саккиз йил ўтгач, у таниқли турк режиссёри Йилмаз Гунайга турмушга чиқди. Аммо бир йил ичида эр-хотин ажрашишди. Оилавий ҳаёт Чеҳре турмуш ўртоғининг қоронғи томонларини очиб берган эди: у мунтазам равишда рафиқасига қўл кўтарар, доим рашк қилар ва янги лойиҳаларда суратга тушишни тақиқлар эди.
1976 йилда Чеҳре иккинчи марта турмушга чиқди. Бу сафар у баскетболчи Явуз Демир учун актрисалик фаолиятини тугатди ва ўзини бутунлай оиласига бағишлади. Аммо Демирга бу етарли эмас эди. У ҳам мунтазам равишда актрисани калтаклар ва ҳатто унинг ҳамроҳлигисиз уйдан чиқиб кетишни тақиқлар эди. Уч йил давом этган бу никоҳ ҳам узилди, сўнг Небаҳат кинога қайтишга қарор қилди.
Карьерасида 10 йил танаффус қилган Чеҳре учун кучли рақобатчиларга тўла шоу-бизнес оламини забт этиш мураккаб кечди, аммо у ўз меҳнати, матонати ва ғалабага бўлган ишончи туфайли ёшлардан кам бўлмаган ҳолда турк кино ва сериаллари юлдузига айланди. Актриса бошқа турмуш қурмади ва фарзандлари ҳам йўқ.
Изоҳ (0)