Жорий йил апрель июнь ойларида Болтиқбўйи давлатларидан (Латвия, Литва, Эстония) Ўзбекистонга пул ўтказмалари ўтган йил мос даврига нисбатан 65,6 фоизга ўсди. Бу ҳақда Марказий банк маълумот берди.
Ҳисоботга кўра, 2025 йил II чорагида меҳнат муҳожирлари томонидан Ўзбекистонга жами 4,8 миллиард доллар миқдорида пул ўтказмалари амалга оширилган. Мазкур рақам ўтган йил мос даврига нисбатан 21,4 фоизга ўсган.
“Жорий динамиканинг шаклланиши асосан меҳнат муҳожирларини қабул қилувчи мамлакатларда валюта курсларининг нисбатан барқарорлиги, иш ҳақининг ошиши ва иқтисодий фаолликнинг юқори суръатлари билан боғлиқ”, дейилади манбада.
Ўтган чоракда турли минтақалардан жўнатилган пул ўтказмалари ўсиш суръатининг сезиларли ўзгариши кузатилган. Хусусан, Болтиқ давлатлари, Европа ва бошқа минтақалардан ўтказмалар ҳажми ўсиш суръати қолган минтақаларга нисбатан юқорироқ сақланиб қолди.
“Бунда, айниқса Болтиқ давлатларидан пул ўтказмаларининг сезиларли ошиши кузатилиб, ўтган йилнинг мос даврига нисбатан 65,6 фоизга ўсди. Шунингдек, мазкур даврда АҚШ, Россия ва Европадан жўнатилган пул ўтказмалари ўсишининг пасайиши (мос равишда 10,3, 23,7 ва 26,9 фоизгача) кузатилган бўлса, Осиёдан ўтказмаларнинг барқарорлашуви сақланиб қолди”, дея қайд этган Марказий банк.
Ташқи бозорда, хусусан Россия, Европа ва Болтиқ давлатларида кузатилаётган сўнгги ўзгаришлар ҳамда меҳнат муҳожирларига бўлган талабнинг ўсиши пул ўтказмаларидаги жорий динамиканинг шаклланишида муҳим аҳамият касб этган. Манба таҳлилида ёзилишича, мазкур тенденция меҳнат муҳожирлари оқими йўналишлари босқичма-босқич кенгаяётганидан далолат беради.
Аввалроқ 2025 йил I чорагида чет элдан Ўзбекистонга келиб тушган пул ўтказмалари 8,2 миллиард долларни ташкил қилганди. Маблағларнинг 78 фоизи Россиядан (6,4 млрд доллар) келиб тушган. Қолган қисми Қозоғистон, АҚШ, Жанубий Корея, Туркия, Буюк Британия, Қирғизистон, Литва ҳамда бошқа мамлакатлар ҳиссасига тўғри келган.
2025 йил июль ҳолатига кўра, Ўзбекистон аҳолисининг 15 миллион 377 минг нафари (41 фоиз) иқтисодий фаол ҳисобланади. Шундан 14 миллион 595 минг нафари (94,9 фоизи) иқтисодиётнинг турли тармоқларида фаолият юритяпти.
Июль ойида давлат корхона ва ташкилотларида 8 миллион 55 минг киши (жами рақамдан 55,2 фоизи) ишлаши қайд этилган. Бу рақам 2024 йил июлдагидан (6 миллион 768 минг киши) 1 миллион 287 минг нафарга ошган (19 фоиз).
Хусусий секторда ишловчилар 4 миллион 760 минг (32,6 фоиз) нафарни ташкил этиб, ўтган йил мос давридагидан 750 минг кишига камайган (13,6 фоиз).
Жорий йил июлда хорижда 1,9 миллион (12,2 фоиз) нафар Ўзбекистон фуқароси меҳнат қилаётгани аниқланган.
Бугунги кунда республика бўйича 781 минг нафар ишга жойлашишга муҳтож аҳоли мавжуд (йил бошида 836,4 минг нафар эди).
Изоҳ (0)