БМТ раҳбарлигидаги халқаро экспертлар гуруҳи Башар Асад ҳукумати, шунингдек ИШИДнинг Умм-Хош ва Хон-Шайхунда кимёвий қуроллар қўлланилиши билан боғлиқ икки ҳолатга алоқадорлигини исботловчи далилларни тақдим этди. Бу ҳақда БМТ ва Кимёвий қуролларни тақиқлаш ташкилотининг қўшма тузилмаси раҳбари Эдмон Муленинг сўзларига асосланиб, «Корреспондент.net» хабар бермоқда.
«Бундай хулосага келиш учун асос бўла оладиган етарлича далиллар тўпланди», — дейди Муле.
Қўшма тузилма маърузасида 2016 йилнинг сентябрь ойида ИШИД томонидан Умм-Хошда, 2017 йилнинг апрелида Хон-Шайхунда Сурия ҳукумат армияси томонидан кимёвий қуролдан фойдаланилганини тасдиқловчи далиллар келтирилади.
Қўшма тузилма, шунингдек мустақил экспертлар таҳлили ва бир неча тан олинган экспертлар баҳосини ҳам олди.
Хабарда қайд этилишича, кимёвий қуролдан фойдаланишнинг аниқ ҳолатлари ҳақидаги маълумотлар 12 давлат, хусусан Сурия ёрдамида тўпланди.
Экспертлар 30 дан ортиқ гувоҳлар кўрсатмасини тинглади, 2,4 мингдан ортиқ фотосуратлар ва 1,2 мингта видеони кўриб чиқди. Бундан ташқари, 120 дан ортиқ аудиоёзувлар тингланди ва 630 дан ортиқ ҳужжат ўрганилди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)