Франция суди 26 июнь куни Сурия президенти Башар Асадни ҳибсга олиш учун ордерни тасдиқлаган. Бу ҳақда Франция идоралари хабарига кўра, BBC маълум қилди.
Манбада айтилишича, Башар Асад Франция расмийлари томонидан тинч аҳолига нисбатан кимёвий қуролдан фойдаланишда айбланмоқда. Расмийлар бундай айблов учун асос етарли эканини иддао қилиб, суддан ордер чиқартирган.
Сурия раҳбарига, шунингдек, инсониятга қарши жиноят ва уруш жиноятлари содир этиш айблови ҳам юкланган. Башар Асад ўз ҳаракатлари учун халқаро судда жавоб бериши кераклиги талаб қилинган.
Франция расмийлари Асадни асосан 2013 йилдаги воқеалар ортидан айбловга тортишни режа қилган. Ўша йили мамлакат шимолидаги Ғута ҳудудида исёнчилар билан жангларда кенг миқёсда кимёвий қуроллар ишлатилгани айтилади. Зарин кимёвий моддаси қўлланиши оқибатида эса кўплаб тинч аҳоли вакиллари ҳам ҳалок бўлган.
Франциянинг терроризмга қарши кураш бўйича қўмитаси прокурорлари Сурия раҳбарини ҳибсга олиш бўйича ордерга эътироз билдирган. Президентнинг давлат раҳбари сифатида дахлсизлик ҳуқуқига эга эканлиги уни судга тортишга халақит бериши айтилган.
Франция олий суди вакиллари ҳибсга олиш ордерини “тарихий қарор” дея баҳолаган. Чунки у давлат раҳбарининг иммунитет ҳуқуқини рад этади.
“Миллий суд амалдаги давлат раҳбарининг шахсий дахлсизлик ҳуқуқига эга эмаслигини биринчи марта очиқ тарзда тан олди”, — деган Франция суди расмийси Клеменс Бектарте.
Маълумот ўрнида, Сурияда 2011 йилда фуқаролар уруши бошланган эди. Дамашқ раҳбарларига мухолиф гуруҳлар мамлакат шимоли ва шимоли-шарқида мустақил идора ташкил этишга киришган. Башар Асад режими эса уларга қарши уруш очган.
Фуқаролар уруши оқибатида ярим миллионга яқин фуқаро ҳалок бўлган. Сўнгги 10 йилда 6 миллионга яқин суриялик мамлакатни тарк этган. Мамлакат шимоли деярли тўлиқ курд қуролли отрядлари ва жангари-эктремистик гуруҳлар назоратига ўтган.
Изоҳ (0)