Middle East Ee нашрининг хабар беришича, Туркия Суриянинг марказий қисмида жойлашган Тияс (Т4) ҳарбий-ҳаво базасини назоратга олишга ҳаракат қилмоқда. Анқара бу ерда ҳаво мудофаа тизимларини жойлаштиришни режа қилган.
Нашрга кўра, Туркия ва Сурия расмийлари ўтган йил декабрдан буён мудофаа шартномаси бўйича музокаралар олиб бормоқда. Мазкур келишувга биноан турклар мамлакатга ҳарбий ёрдам кўрсатиши, Сурия осмонини муҳофаза қилиши кўзда тутилган.
Нашрнинг ўз манбаларига таяниб ёзишича, Анқара мазкур базага маҳаллий ишлаб чиқарилган Ҳисар ҳаво мудофаа тизимини жойлаштириш орқали ўз қўшинлари хавфсизлигини таъминламоқчи. Кейинчалик у ерга кузатув ва жанговар дронлар ҳам олиб келиниши мумкин.
Бундан ташқари, Туркия ҳудудда кўп ҳалқали ҳаво мудофаа тизимини жорий қилиш орқали турли таҳдидларга, жумладан жанговар самолётлар, дронлар ва ракеталарга қарши кураш имкониятига эга бўлмоқчи. Бу эса табиийки Исроилни ташвишга соляпти.
Яҳудий давлати Асад режими қулаганидан буён Суриянинг қатор ҳарбий объектларига, жумладан Т4 базасига бир неча бор ҳаво ҳужумлари уюштирди. Исроил расмийлари Туркиянинг ҳарбий ҳозирлигини хавф сифатида баҳолаб, уни яроқсиз ҳолатга келтирмоқчи.
“Туркиянинг Сурияда ҳарбий база очиши бизнинг ҳаракат эркинлигимизга таҳдид солади”, деган Исроил хавфсизлик хизмати вакили.
Анқара, шунингдек Т4 ёки Палмира базаларига Россиядан сотиб олинган С-400 ҳаво мудофаа тизимларини вақтинча жойлаштириш режасини ҳам кўриб чиқмоқда. Бироқ нашрнинг ёзишича, бу борада якуний қарор ҳали қабул қилинмаган. Қолаверса, Туркиянинг мазкур тизимлар билан баъзи муаммолари бор.
АҚШ билан музокаралар
Россиядан сотиб олинган С-400 тизимлари сабаб АҚШ санкцияларига тушган Анқара Вашингтон билан чекловларни олиб ташлаш бўйича музокара олиб бормоқда. Турклар F-35 бешинчи авлод қирувчиси дастурига қайтиш ниятида. Аммо бунинг учун улар олдига рус қуролларидан воз кечиш талаби қўйиляпти.
Бироқ Қўшма Штатлардан ҳар доим ўз қўшниларига нисбатан бир поғона юқорироқ ҳарбий технологияларни олиб келган Исроил бу режага қарши чиқмоқда. Тель-Авив, Анқара F-35 самолётларига эга бўлса, минтақада кучлар мувозанати бузилиши мумкинлигини таъкидлаяпти.
Изоҳ (0)