АҚШ бошчилигидаги коалиция ИШИД террорчилик ташкилоти Сурия ва Ироқ ҳудудида кимёвий қуролдан фойдаланганини аниқлади. Бу ҳақда коалициянинг расмий вакили Райан Диллонга асосланиб, «РИА Новости» хабар берди.
«Биз иккита турли жойдан кимёвий моддалари мавжуд РПГ (танкка қарши қўл гранатамётлари) гранаталари ва миналарни топдик, улардан кимёвий қурол сифатида фойдаланишга ҳаракат қилинган. Шунингдек, биз аралашмасидан кимёвий қурол яратиш мумкин бўлган саноат маҳсулотлари материаллари захирасини ҳам кўрдик», — деди Диллон.
Расмий Дамашқ бир неча бор маълум қилганига қарамай, август ойида коалиция ИШИД жангариларининг Сурияда кимёвий қуролдан фойдаланганликлари ҳақида билмаслигини таъкидлаган эди.
19 октябрь куни Давлат департаменти Сурияда кимёвий қуроллар бошқа бир террорчилик ташкилоти — «Таҳрир аш-Шом» томонидан қўлланилганини биринчи бор тан олди. Россия Мудофаа вазирлигининг таъкидлашича, гуруҳ фаолият кўрсатаётган Идлиб вилоятида «фақатгина бир марта кимёвий қуролдан фойдаланиш ҳолати қайд этилган — Хон-Шейхунда», бироқ АҚШ унда ҳукумат қўшинларини айблаган. Кейинроқ БМТ экспертлари Сурия президенти Башар Асад тузумини жорий йил 4 апрелида Хон-Шейхун шаҳрида амалга оширилган кимёвий ҳужум учун жавобгар деб топди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)