Сурия хавфсизлик кучлари Дамашқ халқаро аэропортида собиқ бош муфтий шайх Аҳмад Бадриддин Ҳассунни ҳибсга олди. Диний арбоб мамлакатдан қочишга уринган. Бу ҳақда Al Mayadeen хабар берди.
Маълум қилинишича, шайх Ҳассун Уммонга йўл олган ва у ерда шошилинч жарроҳлик амалиётини ўтказиши керак бўлган. У расмийларга даволаниш учун Иорданияга кетиш истагини олдиндан билдирган. Бироқ аэропортнинг фахрий меҳмонлар залига келганидан бир неча дақиқа ўтиб, ҳибсга олинган.
Дамашқда яшириниб юрган собиқ президент Башар Асад тарафдорларини қўлга олиш мақсадида рейдлар ўтказилмоқда. Махсус операция давомида бир неча киши ушланган. Улардан қуроллар, ўқ-дорилар ва портловчи қурилмалар топилган.
Асад тарафдорлари ва Сурия кучлари ўртасидаги тўқнашувлар
Март ойида Латакия, Тартус, Хама ва Хомс вилоятларида Асад тарафдорлари бўлган алавийлар ва янги Сурия ҳукумати ўртасида қуролли тўқнашувлар бошланди. Қурбонларнинг умумий сони 1,3 минг кишидан ошди, улардан мингдан ортиғи тинч аҳоли ҳисобланади. Хавфсизлик кучларининг рейдлари 10 март куни якунланди. Сурия Мудофаа вазирлиги вакили Ҳасан Абдул Ғани ҳукумат хавфсизлик кучлари “ташқаридан ағдарилган Башар Асад режими қолдиқларини зарарсизлантиришга” ва вазиятни барқарорлаштиришга муваффақ бўлганини айтди.
Шундан сўнг Суриянинг янги ҳукумати Россия ҳукуматига Асадни экстрадиция қилиш талаби билан мурожаат қилди. Al Arabiya ва Аl Hadath нашрлари маълумотларига кўра, президент Аҳмад аш-Шараъа Асадни суд қилиш учун уни ушлаб беришни талаб қилмоқда. Шу билан бирга, Россия ҳозирча талабни қондиришдан бош тортмоқда, чунки буни “икки давлат ўртасидаги муносабатларни тиклаш учун енгиб бўлмас тўсиқ эмас” деб ҳисоблайди.
24 март куни Латакия ва Идлиб вилоятлари чегарасидаги тоғли ҳудудларда Асад тарафдорларидан 15 нафар жангари қўлга олинди.
Изоҳ (0)