Хаиоми Mi 11 Ultra’нинг янги режимида смартфоннинг узоқ муддат автономлигини таъминлай олиши маълум бўлди, деб хабар беради Hi-Tech.Mail.ru.
Xiaomi Mi 11 Ultra — Хитой компанияси томонидан ҳозирга қадар тақдим этилган энг қиммат смартфонлардан бири. Ўзидан олдинги Мi сериясидаги флагман моделлардан фарқли равишда у Samsung ва Apple маҳсулотлари билан тўғридан-тўғри рақобатлаша олади. Смартфоннинг ўзига хослиги — қўшимча орқа дисплейга эга эканлигида. Афтидан, тизимнинг сўнгги янгиланишидан кейин митти экран янада фойдалига айланган.
Хитойда Mi 11 Ultra учун дастурий таъминотнинг янгиланган версияси чиқарилган. Янгиланиш V12.5.10.0.RKACNXM йиғиш рақами остида тақдим этилмоқда. У Super Power Saver номи остидаги янги функцияни қўшади. Номидан билиш мумкинки, ушбу режим фойдаланувчи ўз қурилмасини қувватлантира олмаган вақтда смартфон аккумуляторидан самарали фойдаланишга ёрдам беради.
Расмий изоҳга кўра, Super Power Saver режими Mi 11 Ultra’нинг асосий дисплейини ўчиради. Бунда фақат орқа панелдаги қўшимча дисплей ишлашни давом этади. Унинг функционаллиги, албатта, чекланган: дисплей ёрдамида фойдаланувчи фақат вақтни текшириши, қўнғироқларни қабул қилиши ва фавқулодда ёрдам учун олдинроқ ўрнатилган контактни чақириши мумкин.
Xiaomi’дагиларнинг таъкидлашича, Super Power Saver смартфоннинг 14 кунгача автоном режимда ишлашини таъминлайди. Шу билан бирга, компания аккумуляторларнинг ишчанлиги турли омиллар сабаб фарқланиши мумкинлигини қайд этади. Нима бўлганда ҳам, янги функция электр энергияси узоқ вақтга ўчганда ҳақиқатан фойда беради.
Аввалроқ Xiaomi Mi 12 Ultra янги Snapdragon 895 процессори ўрнатилган биринчи смартфонга айланиши, Xiaomi смартфон қувватини 8 дақиқада тўлиқ тўлдиришга қодир қувватлантиргични тақдим этгани тўғрисида хабар берилганди.
Изоҳ (0)