Xiaomi korporatsiyasi aksiyalari Gonkongdagi savdolarda haydovchiga yordam berish tizimidan foydalangan elektromobil YTHga uchragani haqidagi xabarlardan so‘ng 5,5 foizga arzonlashdi.
Xiaomi kompaniyasi Weibo ijtimoiy tarmog‘ida SU7 rusumli elektromobil 29-mart kuni Anxoy viloyatidagi tezyurar avtomagistralda avariyaga uchraganini tasdiqladi. Rasmiy bayonotda jabrlanganlar borligi aytilmagan, biroq Xitoy OAVlari uch kishi halok bo‘lgani haqida xabar bermoqda.
Kompaniya politsiya voqea tafsilotlarini aniqlayotganini ma’lum qildi.
Dastlabki hisobotga ko‘ra, haydovchiga yordam berish tizimi avariyadan 20 daqiqa oldin faollashtirilgan va bir necha bor rulni ushlab turish kerakligi haqida ogohlantirgan. Haydovchi boshqaruvni o‘z qo‘liga olganidan bir necha soniya o‘tib, to‘qnashuv yuz bergan.
Mahalliy OAV ma’lumotlariga ko‘ra, zarbadan so‘ng elektromobilda o‘t chiqqan va kuzovning katta qismi shikastlangan.
Mutaxassislar avariya avtonom haydash texnologiyalari xavfsizligi bo‘yicha savollar tug‘dirmoqda, deb ta’kidlamoqda.
2024-yilda Xiaomi SU7 Series elektromobillari yetkazib berilishi 136 854 donani tashkil etgan. Mart oyida kompaniya 2025-yil uchun bashoratini 300 mingdan 350 ming donagacha oshirgan.
Izoh (0)