Хитойнинг 100 та энг бадавлат ишбилармонларининг умумий бойлиги йил давомида 39 фоизга камайиб, 907,1 миллиард долларга тушиб кетди. Ўтган йили уларнинг умумий капитали 1,48 миллиард долларга баҳоланган. Бу ҳақда Forbes хабар бермоқда.
- Фото: Wall Street Journal
Маълумотларга кўра, бу хитойлик миллиардерлар бойлигининг сўнгги 20 йилдан ортиқ вақтдаги энг сезиларли пасайишидир.
Бу даврда фақат иккита тадбиркорнинг бойлиги ўсган, 79 та миллиардер эса қашшоқлашган.
Ўтган йил Хитой учун сўнгги ўн йилликлардаги энг оғир йиллардан бири бўлди. Бу рўйхатдаги энг бадавлат 100 кишининг бойлиги сезиларли даражада камайди, — деди Forbes журналининг энг бой хитойликлар рейтингини тузувчи Рассел Фланнери.
Хитойлик миллиардерларнинг бойлиги ҳукуматнинг IT соҳасига босими, COVID-19 локдаунлари, иқтисодий ўсишнинг секинлашиши ва юаннинг долларга нисбатан 12 фоизга пасайиши фонида камайди.
Хитой расмийларининг технологик соҳага эътиборининг кучайиши фонида дунёдаги энг йирик смартфон ишлаб чиқарувчилардан бири Xiaomi раҳбари Лей Жуннинг бойлиги икки баравардан кўпроқ қисқарди — 2021 йилдаги 17,9 миллиард доллардан 2022 йилда 7,6 миллиард долларгача.
JD.com электрон тижорат гиганти раҳбари Ричард Лиунинг капитали ўтган йилги 17,6 миллиард доллардан 8,3 миллиард долларгача камайди.
Alibaba асосчиси Жек Ма ҳам бойлигини сақлаб қололмади: миллиардернинг капитали деярли икки баробарга қисқарди — ўтган йилги 41,5 миллиард доллардан бу йил 20,6 миллиард долларгача. Шунга қарамай, Ма рейтингдаги бешинчи ўрнини сақлаб қолди.
JA Solar Technology асосчиси ва раҳбари Жин Баофангнинг бойлиги 16 фоизга — 8,95 миллиард доллардан 10,4 миллиард долларгача ўсди, Трина Солар компаниясининг эгаси Гао Жифан капитали эса ўтган йилги 7,16 миллиард долларга нисбатан 7,3 миллиард долларгача кўпайди.
Бу йил рўйхатга Shein онлайн кийим-кечак сотувчиси асосчиси Крис Ху ҳам қўшилди. Манбаларга кўра, апрель ойида унинг компанияси 1 миллиард доллар даромад олган.
Бу Американинг Forbes журналига кўра, бошқа иккита йирик кийим-кечак сотувчиси Зара ва H&M’нинг умумий бозор қийматидан кўпроқ. Шундай қилиб, Ху 10 миллиард долларлик бойлиги билан 25-ўринни эгаллади.
Энг бой хитойликлар рўйхатида ўтган йилдагидек биринчи қаторни Хитойнинг энг йирик сув етказиб берувчиси Nongfu Spring директорлар кенгаши раиси Чжунг Шаншан эгаллади. Унинг бойлиги 62,3 миллиард долларга баҳоланган.
ByteDance асосчиси Чжан Йиминг 49,5 миллиард доллар билан иккинчи ўринда қолди, унинг бойлиги ўтган йилга нисбатан 9,9 миллиард долларга камайган.
CATL электромобиллари учун аккумулаторлар ишлаб чиқарувчи дунёдаги энг йирик компания директорлар кенгаши раиси Робин Зенг ҳам учинчи ўринни сақлаб қолди. Унинг бойлиги 28,9 миллиард долларга баҳоланган, бу ўтган йилга нисбатан 43 фоизга кам.
Аввалроқ россиялик миллиардерлар йил бошидан бери 83,4 млрд доллар йўқотгани ҳақида хабар берилганди.
Изоҳ (0)