Покистон Жаҳон иттифоқи (PWА) инсон ҳуқуқлари ташкилоти Покистоннинг собиқ бош вазири, энг йирик мухолифат партияси — “Адолат учун ҳаракат” асосчиси Имрон Хонни тинчлик бўйича Нобель мукофотига номзод этиб кўрсатди. Бу ҳақда Тhе Times of India нашри хабар бермоқда.
“Биз Имрон Хонни Покистонда инсон ҳуқуқлари ва демократик қадриятларни ҳимоя қилишга қўшган ҳиссаси учун тинчлик бўйича Нобель мукофотига номзод этиб кўрсатдик”, дейилади PWА баёнотида.
Имрон Хон ушбу нуфузли мукофотга иккинчи марта номзод сифатида кўрсатилмоқда. 2019 йилда у Покистонда Ҳиндистон билан ҳарбий кескинликни юмшатиш бўйича саъй-ҳаракатлари учун тинчлик бўйича Нобель мукофотига номзод этиб кўрсатилган ва ўшанда Покистон парламентига унинг номзодини қўллаб-қувватлаш тўғрисидаги резолюция киритилганди.
Бироқ Хон ўзини Нобель мукофотига лойиқ эмас, деб ҳисоблаб, бу мукофотни “Кашмирнинг кимга тегишлилиги бўйича Покистон-Ҳиндистон можаросини якуний ҳал қилишга эришган ва субконтинентда тинчликка йўл очган” сиёсатчи олиши кераклигини айтган.
Имрон Хон 2018—2022 йилларда Покистон Вазирлар Маҳкамасига раҳбарлик қилган. У 2022 йил 10 апрель куни парламентда ўзига нисбатан билдирилган ишончсизлик вотуми натижасида лавозимидан четлаштирилган. 2023 йилдан буён сиёсатчи ҳокимиятни суиистеъмол қилиш ва коррупцияда айбланиб, 14 йиллик қамоқ жазосини ўтамоқда.
Изоҳ (0)