Pokiston Jahon ittifoqi (PWA) inson huquqlari tashkiloti Pokistonning sobiq bosh vaziri, eng yirik muxolifat partiyasi — “Adolat uchun harakat” asoschisi Imron Xonni tinchlik bo‘yicha Nobel mukofotiga nomzod etib ko‘rsatdi. Bu haqda The Times of India nashri xabar bermoqda.
“Biz Imron Xonni Pokistonda inson huquqlari va demokratik qadriyatlarni himoya qilishga qo‘shgan hissasi uchun tinchlik bo‘yicha Nobel mukofotiga nomzod etib ko‘rsatdik”, deyiladi PWA bayonotida.
Imron Xon ushbu nufuzli mukofotga ikkinchi marta nomzod sifatida ko‘rsatilmoqda. 2019-yilda u Pokistonda Hindiston bilan harbiy keskinlikni yumshatish bo‘yicha sa’y-harakatlari uchun tinchlik bo‘yicha Nobel mukofotiga nomzod etib ko‘rsatilgan va o‘shanda Pokiston parlamentiga uning nomzodini qo‘llab-quvvatlash to‘g‘risidagi rezolyutsiya kiritilgandi.
Biroq Xon o‘zini Nobel mukofotiga loyiq emas, deb hisoblab, bu mukofotni “Kashmirning kimga tegishliligi bo‘yicha Pokiston-Hindiston mojarosini yakuniy hal qilishga erishgan va subkontinentda tinchlikka yo‘l ochgan” siyosatchi olishi kerakligini aytgan.
Imron Xon 2018—2022-yillarda Pokiston Vazirlar Mahkamasiga rahbarlik qilgan. U 2022-yil 10-aprel kuni parlamentda o‘ziga nisbatan bildirilgan ishonchsizlik votumi natijasida lavozimidan chetlashtirilgan. 2023-yildan buyon siyosatchi hokimiyatni suiiste’mol qilish va korrupsiyada ayblanib, 14 yillik qamoq jazosini o‘tamoqda.
Izoh (0)