Покистон армияси мамлакат жануби-ғарбида юзлаб йўловчилар бўлган поездни олиб қочган жангариларга қарши ҳарбий операция якунланганини маълум қилди.
Reuters берган маълумотларга кўра, жами 400 дан ортиқ йўловчини гаровда сақлаган 33 жангари йўқ қилинган.
Қурбонлар орасида тинч аҳоли вакиллари билан бирга ҳарбийлар ҳам бор. Расмий манбаларга кўра, операция давомида 33 га яқин жангари ва гаровга олинганларнинг 21 нафари ҳамда 4 нафар ҳарбий ҳалок бўлган.
11 март куни бошланган можарода Балужистон озодлик армиясининг (BLA) айирмачи жангарилари Кветтадан Пешоварга кетаётган Жаффар экспресс поездини эгаллаб олди.
Жангарилар темир йўлнинг бир қисмини портлатиб юбориб, ичида 400 дан ортиқ йўловчи, жумладан, 100 дан ортиқ хавфсизлик ходими бўлган поездга қарата ракеталар отган. Ҳужум учун жавобгарликни Балужистонга кўпроқ автономия ёки мустақиллик беришни истаган BLA айирмачи гуруҳи ўз зиммасига олди. Ушбу гуруҳ сўнгги йилларда хавфсизлик кучлари ва инфратузилма объектларига кўплаб ҳужумлар уюштирмоқда.
Жангарилар гаровга олинганларнинг бир қисмидан жонли қалқон сифатида фойдаланган. Уларнинг худкуш нимчалари ҳарбийларни чалғитган. Қийинчиликларига қарамай, ҳарбийлар 300 дан ортиқ йўловчини қутқаришга муваффақ бўлди. BLA гаровга олинганларнинг талаблари бажарилмаса, уларни қатл қилиш билан таҳдид қилган.
Поезд машинисти Амжад сўзларига кўра, ҳужум бошланганда у бошқарув кабинасининг поли остига яширинган ва у ерда 27 соат қолиб кетган. Жангарилар уни ўлдига чиқарган.
Покистон бош вазири Шаҳбоз Шариф 13 март куни Балужистонга ташриф буюриб, гаровдан озод этилганлар билан учрашди. У ҳужумни “қўрқоқлик” деб қоралаб, минтақада хавфсизликни кучайтиришга ваъда берди. Расмийларнинг билдиришича, ҳалок бўлганлардан 25 нафарининг жасади Кветтага олиб кетилган, у ерда оилалар мотам маросимларини ўтказади.
Ушбу ҳолат Покистон ҳукумати ва Балужистондаги айирмачи гуруҳлар ўртасида давом этаётган қарама-қаршиликни янада мураккаблаштирди. BLA Покистон ва бир қатор Ғарб давлатлари томонидан “террорчилик ташкилоти” деб топилган.
Покистон Афғонистон ва Эрон билан чегарадош Балужистон каби ҳудудда хавфсизлик билан боғлиқ мураккаб муаммоларга дуч келмоқда. Халқаро ҳамжамият бундай террорчилик ҳаракатларини қоралаб, можароларни тинч йўл билан ҳал этиш зарурлигини таъкидлади.
Изоҳ (0)