Покистоннинг қамоқдаги собиқ бош вазири Имрон Хоннинг партияси сиёсатчининг “ҳаёти хавф остида” эканини маълум қилди. Бу ҳақда Al Jazeera хабар берди.
70 ёшли Хон Исломободдаги суд томонидан коррупция иши бўйича айбланганидан сўнг ҳибсга олинди ва уч йилга қамоқ жазосига ҳукм қилинди. Хоннинг Покистон Теҳрик-э-Инсаф (PTI) партияси раиси ўринбосари Шоҳ Маҳмуд Қурайший сиёсатчига сўнгги икки кун давомида адвокатлари билан учрашишга рухсат берилмаганини айтди.
У партия раҳбарияти Хоннинг аҳволидан “жуда хавотирда” эканини билдирди.
“Бизнинг устувор вазифамиз Хоннинг хавфсизлигидир. Унинг ҳаёти хавф остида эканига ишониш учун асосларимиз бор ва буни мамлакатнинг юқори судлари эътиборга олишини сўрайман. Биз адолат ғалаба қозонишига умид қиламиз”, — деди Покистон собиқ ташқи ишлар вазири Қурайший.
У Хон сақланаётган қамоқхонада қулай шароит йўқлигини қўшимча қилди.
“Хонга маҳбуслик ҳуқуқи берилмаган. Биз у билан кўришишда қийинчиликларга дуч келяпмиз. Унга қандай овқат берилаётгани, қандай муносабатда бўлаётганини билмаймиз”.
Суд қарорига кўра, уни Адиала қамоқхонасига ўтказиш керак эди, лекин бунинг ўрнига уни Атток қамоқхонасига олиб кетишди ва ҳеч ким бизга нега бундай бўлганини тушунтирмади”, — дейди Қурайший
Атток Панжобдаги Равалпинди гарнизон шаҳридан 100 километр шимолда жойлашган. Покистон расмийлари ҳозирча қамоқхонадаги ўзгаришлар бўйича ҳеч қандай изоҳ бермаган.
“Имрон Хон кичкина, бир кишилик камерада сақланмоқда”, — дейди қонунчи.
Хон бош вазир бўлганида чет эл ҳукуматлари ва расмийларидан олган совғалари ҳақида Покистон Сайлов комиссиясига ёлғон баёнот бергани учун қамалган.
Изоҳ (0)