Покистонда судланган сиёсатчиларга нисбатан умрбод тақиқ бекор қилинди

Покистон Олий суди жиноий жавобгарликка тортилган сиёсатчиларга нисбатан бир умрлик тақиқни бекор қилди. Бу ҳақда Deutsche Welle хабар берди.

Олий суд раиси Қози Фаэз Исо ўз қарорида умрбод тақиқлар “фуқароларнинг сайловларда иштирок этиш бўйича асосий ҳуқуқини чеклайди” деди. Бу қарор собиқ бош вазир Навоз Шарифга тўртинчи марта юқори лавозимга даъвогарлик қилишига йўл очди.

Эслатиб ўтамиз, собиқ бош вазир Навоз Шариф судланган шахсларнинг сайловларда иштирок этишига умрбод тақиқ қўйилгани сабабли дисквалификация қилинган эди. Олий суд қарори барча потенциал номзодлар учун бу тўсиқни олиб ташлади. Шариф 8 февраль куни ўз номзодини қўйиши мумкин.

74 ёшли Шариф 2017 йилда адолатсиз амалиётларда айбдор деб топилган ва тақиқ сабабли лавозмни эгаллаш ҳуқуқидан маҳрум қилинган.

2023 йили судлар Шарифга нисбатан иккала ҳукмни ҳам бекор қилган, бироқ у дисквалификация қилинган. Шарифнинг партияси, Покистон мусулмон лигаси-Наваз 8 февралга белгиланган сайловларда ғалаба қозониш учун асосий даъвогар саналади.

“Навоз Шарифни сиёсий қасос нишонига айлантириш учун уни умрбод четлатишга қаратилган суд адолатсизлигининг қоронғу боби тугади” — деди лига етакчиларидан бири Марриум Аурангзеб.

Шарифнинг асосий рақиби, собиқ бош вазир Имрон Хон суд жараёнлари фонида қамоқда. Шунингдек, унга беш йилга сиёсатда қатнашиш тақиқланган.