Грузия бош вазири Иракли Кобахидзе 4 март куни расмий ташриф билан Ўзбекистонга келди.
Уни Тошкент халқаро аэропортида бош вазири Абдулла Арипов ва бошқа расмийлар кутиб олди.
Ташриф дастуридан қатор икки томонлама учрашувлар ва ҳукуматлараро қўшма комиссия йиғилишини ўтказиш, саноат корхоналари фаолияти билан танишиш ва бошқалар ўрин олгани ҳақида аввал хабар қилинган эди.
2022 йилнинг июлида ўша вақтдаги Грузия бош вазири Ираклий Гарибашвили бошчилигидаги ҳукумат делегацияси Тошкентга келганди. Ташриф чоғида Ираклий Гарибашвили президент Шавкат Мирзиёев қабулида бўлиб, икки томонлама амалий ҳамкорликни янада кенгайтиришга келишиб олинганди. 2023 йилнинг июлида эса Ўзбекистон бош вазири Абдулла Арипов бошчилигидаги делегация 17—18 июль кунлари Тбилисида бўлиб, Грузия ҳукумати билан музокаралар ўтказган эди.
Ўзбекистонга бундан аввал Шавкат Мирзиёевнинг таклифига биноан Покистон бош вазири Шаҳбоз Шариф расмий ташриф буюрганди. 25—26 февраль кунлари бўлиб ўтган ташриф давомида тор доирада ва расмий делегациялар иштирокида музокаралар ўтказилди. Унинг якунида Шавкат Мирзиёев ва Покистон бош вазири Шаҳбоз Шариф кўп қиррали Ўзбекистон—Покистон ҳамкорлигини янада ривожлантириш ва мустаҳкамлашга қаратилган қўшма декларация ҳамда икки томонлама Олий даражадаги стратегик шериклик кенгашини тузиш тўғрисидаги баённома ва икки томонлама битимларнинг салмоқли тўплами имзоланди.
Ўзбекистон президенти учрашувлар самарали бўлганини алоҳида қайд этиб, ушбу тарихий ташриф Ўзбекистон—Покистон стратегик шериклигида янги саҳифа очишини таъкидлади.
Изоҳ (0)