Покистон Олий суди собиқ бош вазир Имрон Хоннинг ҳибсга олинишини ноқонуний деб топди ва уни зудлик билан озод қилишни буюрди. Бу ҳақда Reuters хабар берди.
Имрон Хон коррупцияда айбланиб ҳибсга олиниши ортидан Покистонда оммавий норозилик намойишлари ва тартибсизликлар бошланганди.
“Олий суд Имрон Хонга қарши барча суд жараёнларини бекор қилди. Ундан жума куни эрталаб Исломобод Олий судига келиш сўралган”, — деган Хоннинг адвокати Бабар Аван.
Аваннинг қўшимча қилишича, Олий суд Хон ҳозир коррупцияга қарши агентликка эмас, балки унинг қармоғида эканини билдирган.
Хон тунни аввалгидек полициянинг меҳмонлар уйида ўтказган, аммо чекланган миқдордаги дўстлари ва оила аъзолари билан учрашишга рухсат берилган. Унинг қачон уйига қўйиб юборилиши ҳозирча аниқ эмас.
Имрон Хон ўзига қарши ҳар қандай қонунбузарликни рад этади. Унинг ҳибсга олиниши натижасида юзага келган зўравонликлар оғир иқтисодий инқироз билан курашаётган 220 миллион аҳолиси бўлган мамлакатдаги беқарорликни янада кучайтирди ва XBЖ ёрдамини тезда қайта тиклаш умидларини пучга чиқарди.
Хон тарафдорларининг полиция билан тўқнашуви, ҳарбий иншоотларга ҳужум қилиши ва бошқа ҳукумат бинолари ва мулкига ўт қўйиши натижасида 2 мингга яқин одам ҳибсга олинди ва камида беш киши ҳалок бўлди.
Изоҳ (0)