Покистон президенти Ориф Алви бош вазир Шаҳбоз Шарифнинг таклифига биноан 9 август куни мамлакат парламенти тарқатиб юборилганини эълон қилди, деб хабар бермоқда Покистоннинг Dawn нашри.
“Президент Конституциянинг 58-моддаси 1-қисмига асосан бош вазир тавсиясига кўра, Миллий Мажлисни тарқатиб юборди”, — дейилади Президент девонининг расмий аккаунтида эълон қилинган баёнотда.
Покистонда навбатдаги парламент сайловлари 90 кун ичида бўлиб ўтиши керак.
Бундан ташқари, амалдаги Вазирлар Маҳкамасининг ваколатлари тугатилди, унинг ўрнида муваққат ҳукумат тузилади ва бош вазир номзоди аниқланади. Яқин уч кун ичида Шаҳбоз Шариф Миллий Ассамблеядаги мухолифат етакчиси Ража Риаз билан биргаликда республика ҳукуматини вақтинча ким бошқаришини ҳал қилиши керак. Агар улар номзод бўйича бир қарорга келмаса, бу вазифани парламентнинг махсус қўмитаси ҳал этади. Унинг таркибига тенг миқдордаги ҳукмрон ва мухолифат вакиллари киради.
Парламент аъзолари билан хайрлашув нутқида Шариф ҳокимиятда бўлган 16 ойни бутун 38 йиллик сиёсий фаолиятидаги энг қийин синов деб атади.
ОАВ Шаҳбоз Шариф ўтган йилнинг апрелидаги воқеаларда фаол иштирок этиб, ҳукумат раҳбари бўлганини эслатди. Ўшанда бош вазир Имрон Хонга ишончсизлик вотуми эълон қилиниб, у ўз лавозимини тарк этишга мажбур бўлганди. Кейинроқ Хон мамлакат бюджетига зарар етказиш иши бўйича қамоққа ташланган, аммо шу йилнинг май ойида гаров эвазига озод қилинган.
Тергов маълумотларига кўра, Хон ва унинг энг яқин тарафдорлари Ал-Қодир университетини ташкил этиш учун қўшма жамғарма ташкил этган, бу эса мамлакат бюджетига 170 миллион долларга яқин зарар етказган.
5 август куни Имрон Хон “коррупцион ҳаракатлар” учун уч йиллик қамоқ жазосига ҳукм қилинди ва сиёсий фаолиятдан четлаштирилди. Хоннинг адвокати қарор устидан шикоят қилишини айтди.
Изоҳ (0)