Ўзбекистон президенти Шавкат Мирзиёев ва Покистон бош вазири Шаҳбоз Шариф 30 март куни телефон орқали мулоқот қилди. Давлат етакчилари Рамазон ҳайити (Ийд ал-Фитр) байрами муносабати билан бир-бирларини самимий қутлади. Бу ҳақда президент матбуот хизмати хабар берди.
Сиёсатчилар Ўзбекистон ва Покистон халқларига тинчлик-осойишталик, фаровонлик ва равнақ тилади. Февраль ойида Покистон бош вазирининг Ўзбекистонга ташрифи давомида эришилган келишувларни “йўл харитаси”га мувофиқ амалга ошириш муҳокама қилинди.
Вазирликлар, идоралар ва тармоқлар даражасидаги мулоқотлар фаоллашгани ва алмашинувлар самарали тус олганига эътибор қаратилди. Март ойида Исломобод шаҳрида Ўзбекистон озиқ-овқат маҳсулотлари кўргазмаси муваффақиятли ўтказилди. Апрель ойидан эса Лаҳорга қўшимча авиарейслар йўлга қўйилиши режалаштирилган.
Қўшма лойиҳаларнинг ижросини кўриб чиқиш ва уларни жадаллаштириш чораларини кўриш учун Ҳукуматлараро комиссиянинг навбатдаги йиғилишини 2025 йилда ўтказиш муҳимлиги таъкидланди. Ўзбекистон ва Покистон етакчилари минтақа кун тартибидаги долзарб масалалар юзасидан ҳам фикр алмашди.
Маълумот ўрнида, Шавкат Мирзиёев 30 март куни Туркия президенти Ражаб Тоййиб Эрдўғон билан телефон орқали мулоқот қилганди. Президентлари бир-бирларини Рамазон ҳайити билан табриклаган. Томонлар халқаро аҳамиятга молик долзарб масалалар юзасидан ҳам фикр алмашган.
Изоҳ (0)