Покистоннинг жануби-ғарбий Балужистон вилоятида сепаратист жангарилар йўловчи поездини гаровга олиб, камида 10 кишини ўлдирди. Ҳукумат ва темирйўл расмийларининг 11 март кечга яқин эълон қилинган баёнотига кўра, қурбонлар орасида 9 нафар хавфсизлик ходими ва поезд машинисти бор.
Маълум қилинишича, жангарилар Жаффер Эхпресс поездини Болан туманидаги туннел ичида тўхтатган. Поезд Қуэттадан Пешоварга йўл олган бўлиб, 9 та вагонда тахминан 450 нафар йўловчи бор эди. Ҳужум чоғида “шиддатли отишма” кузатилган.
Хавфсизлик кучлари ҳозиргача 155 кишини озод қилди. Ярадорлар шифохонага етказилган, қолганларни қутқариш ишлари давом этмоқда.
Мазкур ҳужум учун жавобгарликни “Балужистон озодлик армияси” ўз зиммасига олди. У Покистондан мустақиллик амбицияси билан мунтазам террорчилик актлари уюштириб туриши билан машҳурдир.
Жангарилар гаровдагиларни “қириш” билан таҳдид қилган. Бироқ, шунга қарамай, Балужистон раҳбари Мир Сарфраз Бугти ҳарбий амалиёт “охирги террорчи йўқ қилингунга қадар” давом этишини билдирди. Сўнгги маълумотларга кўра, 27 нафар жангари йўқ қилинган, яна бир қанчаси жароҳатланган.
Покистон бош вазири Шаҳбоз Шариф ҳужумни қоралаб, уни рамазон ойида тинч аҳолини нишонга олган “террористик жиноят” деб атади.
Балужистонда террорчилик ҳаракатлари вақти-вақти билан юз бериб туради. Сепаратистлар, айниқса, Хитой томонидан ижарага олинган Гвадар портини тез-тез нишонга олиб келади.
Сўнгги йилларда “Бир макон, бир йўл” лойиҳасининг бир қисми ҳисобланган мазкур порт ва унинг ишчиларига қарши кўплаб портлашлар ва хуружлар юз берди. Оқибатда кўплаб хитойликлар ҳалок бўлган.
Изоҳ (0)