Покистон суди собиқ бош вазир Имрон Хонни ҳукумат раҳбари бўлиб ишлаган пайтда олган совғалари ҳақида нотўғри маълумот беришга оид коррупцияда айбдор деб топди ва уни уч йилга озодликдан маҳрум қилди.
Dawn нашрига кўра, суд залига фақат адвокатлар киритилган. Суд мажлиси вақтида намойишларга йўл қўймаслик учун суд биноси ташқарисида қўшимча полиция кучлари навбатчилик қилган.
Имрон Хон 2018 йилдан 2022 йилгача Покистон бош вазири бўлган эди. 2022 йил апрель ойида унга ишончсизлик вотуми берилди. Октябрь ойида Хон сайловдан четлаштирилди ва беш йилга давлат лавозимини эгаллаш ҳуқуқидан маҳрум этилди.
2023 йилнинг 9 май куни Имрон Хон полиция томонидан қўлга олинди. У ва рафиқаси Бушра Биби коррупцияда ҳамда Ал-Қадр университетини ташкил этиш давомида Al-Qadeer Trust оилавий фондидан бюджетдан 50 миллиард Покистон рупийсини (тахминан 175 миллион доллар) ўғирлаш мақсадида фойдаланганликда айбланди. 10 май куни суд Хонни ҳибсга олди, бу эса мамлакатда оммавий норозиликларга сабаб бўлди. 11 май куни ҳибсга олиш ноқонуний деб топилди ва собиқ бош вазир гаров эвазига озод қилинди.
Изоҳ (0)