Покистон ҳукумати Имрон Хон партиясини мамлакат ҳудудида тақиқлайди

Покистон ҳукумати собиқ бош вазир Имрон Хоннинг партиясини мамлакат ҳудудида тақиқлашни режалаштирмоқда. Бу ҳақда Покистон ахборот вазири берган маълумотга асосланиб, Reuters нашри хабар берди.

Манбага кўра, “Адолат ҳаракати” партияси фаолиятига чек қўйиш борасида Покистон ҳукуматига бир неча бор мурожаат юборилган. Исломобод ҳукуматига яқин манбалар ушбу маълумотни тасдиқлаган.

Партияга тақиқ қўллаш учун асос бўладиган бир қатор сабаблар келтирилган. Хусусан, расмийлар “Адолат ҳаракати” партиясини мамлакатдаги номаълум манбалар ҳамда хорижий тармоқлардан пул олганликда айблаган.

Марказий ҳукуматнинг қатор расмийлари партияни ўтган йили ҳарбий объектларга ҳужум уюштирилишига олиб келган тартибсизликларни ташкил этишда айблаган. Бу борада текширув ва ўрганишлар давом этаётгани билдирилган.

Федерал ҳукумат “Адолат ҳаракати”ни тақиқлаш бўйича иш қўзғатади. Агар керак бўлса, Вазирлар Маҳкамаси ва Олий суд ҳам бу ишга аралашади, дейилади Исломобод расмийлари эълон қилган хабарда.

Маълумот ўрнида, тақиққа учраш арафасида турган партия раҳбари, мамлакат собиқ бош вазири Имрон Хон август ойидан бери ҳибсда сақланмоқда. У учинчи рафиқаси билан ноқонуний ва ношаръий асосда оила қуриб яшаб келганликда айбланган эди.

Суд Имрон Хонга қўйилган айблов ўз тасдиғини топмагани учун уни бекор қилган. Шунга қарамай, ҳеч бир модда бўйича айбдорлиги исботланмаган собиқ бош вазир озодликка чиқарилмаяпти.