Покистонда ҳукмрон коалиция тарафдори бўлган 20 мингдан ортиқ одам мамлакат Олий суди олдида йиғилиб, собиқ бош вазир Имрон Хоннинг озод этилишига қарши намойиш ўтказди, деб хабар бермоқда Bloomberg. Сиёсатчи 12 май куни гаров эвазига қамоқдан озод этилганди.
Имрон Хонга қарши намойишларда Покистон Демократик партияси президенти Маулан Фадал-Раҳмон ва Покистон Мусулмон Лигаси партияси биринчи вице-президенти Марям Навоз Шариф бошчилигидаги ҳукумат партиялари етакчилари ўз тарафдорлари олдида чиқиш қилди.
Ekspress Tribune нашрининг ёзишича, намойишчилар норозилик сифатида ёппасига ўтириб олган, бошқарув қўмитаси эса суд биноси ташқарисида чодирлар қуришни бошлаган.
Bloomberg агентлигининг хабар беришича, намойишчилар бош судьянинг истеъфосини талаб қилмоқда.
9 май куни Имрон Хон полиция томонидан ҳибсга олинган. У ва рафиқаси Бушра Биби коррупцияда ва Ал Қадир университетини ташкил этиш пайтида давлат бюджетидан 50 миллиард Покистон рупийсини (тахминан 175 миллион доллар) ўзлаштириш учун Al Qadeer Trust оилавий жамғармасидан фойдаланганликда айбланмоқда.
Эртасига, 10 май куни Исломобод Олий суди Имрон Хонни саккиз кунга ҳибсга олди. Шундан сўнг Покистонда унинг тарафдорлар оммавий намойишлар ўтказишни бошлади. Dawn портали маълумотларига кўра, мамлакатнинг турли минтақаларида ўтказилган норозилик намойишлари натижасида 1 000 дан ортиқ одам ҳибсга олинган. 11 май куни Покистон суди сиёсатчининг ҳибсга олинишини ноқонуний деб топди ва уни зудлик билан ҳибсдан озод қилиш ҳақида буйруқ берди. 15 май куни Бишра Биби ҳам гаров эвазига озод қилинди.
Имрон Хон 2018 йилдан 2022 йилгача Покистон бош вазири лавозимида ишлаган. Ўтган йилнинг апрель ойида унга ишончсизлик вотуми берилган эди. Октябрь ойида Хон сайловдан четлаштирилди ва беш йилга давлат лавозимини эгаллаш ҳуқуқидан маҳрум қилинди.
Изоҳ (0)