“Толибон” етакчиси Ҳайбатуллоҳ Охундзода илк бор Исроил урушига муносабат билдирди ва фаластинликлар қирғин қилинаётганини айтди. Бу ҳақда Aamaj News хабар берди.
Исроилнинг ҲАМАС билан урушига 100 кундан ортиқ вақт ўтди, Ҳайбатуллоҳ Охундзода Ғарбнинг инсон ҳуқуқларини таъминлаш даъвосига қарамай, Фаластинда мусулмонлар “геноцид” қилинаётганини таъкидлади.
У миллий радио ва телевидение директори ўринбосари Ҳидоятуллоҳ Ҳидоят томонидан эфирга узатилган аудиода, Ғарб Афғонистон ва бошқа мамлакатларда инсон ҳуқуқларини ҳурмат қилмаётганини айтди.
“Бугун сиз дунёда инсон ҳуқуқлари ҳақида нодон ва золимларнинг овозини эшитяпсиз, лекин Фаластинда мусулмонларга нисбатан қаттиқ зулм давом этмоқда ва улар геноцид қилиняпти”, — деди Охундзода.
Фуқаролар, хусусан, афғон аёллари ва халқаро институтларнинг “Толибон”томонидан аёллар ҳуқуқлари поймол этилаётганидан хавотирланишига қарамай, “Толибон” етакчиси яна бир бор афғон аёллари ҳуқуқларини тиклаганини даъво қилди.
Охундзодага тегишли бўлган аудиода “Толибон” даврида “Афғонистонда аёллар ҳуқуқлари ҳурмат қилиниши, аввалги режимларда бунга эътибор берилмагани” айтилган.
“Толибон” ҳаракати ҳокимиятга келганидан сўнг, Афғонистон халқи, хусусан, афғон аёллари ва қизларининг университет ва мактабларга бориши, аёлларнинг ёрдам ташкилотларида ишлаши ва боғларга боришига бир қатор чекловлар қўйган. Сўнгги кунларда “Толибон” Кобулнинг турли ҳудудларида ҳижобга риоя қилмагани учун ўнлаб аёллар ва қизларни ҳибсга олган.
Афғонистонда аёлларга нисбатан жорий қилинган тақиқлар қуйидагилар:
- афғонистонлик аёлларнинг БМТ идораларида ишлаши;
- эркакларга аёллар учун кийим тикиш;
- аёлларнинг эркак шифокорларга бориши;
- аёлларнинг шифохонага ёлғиз бориши;
- аёлларнинг истироҳат боғига ташриф буюриши,
- оилалар ва аёлларнинг боғлари ёки яшил ҳудудлари бўлган ресторанларга кириши,
- аёллар овози эшитилган рекламаларни эфирга узатиш тақиқланган.
Изоҳ (0)