“Толибон” Ички ишлар вазирлиги Афғонистон жанубидаги Ҳилманд вилоятида 587 гектар афюн экиладиган ер йўқ қилинганини маълум қилди.
Шунингдек, “Толибон”нинг наркотикларга қарши кураш полицияси Қандаҳор ва Урузгон вилоятларидаги 58 гектар ер ҳам афюндан тозалангани ҳақида хабар берди.
“Толибон” тақиқлаганига қарамай, Афғонистонда, айниқса, мамлакат жанубида таркибида гиёҳванд модда бор ўсимликлар етиштириш давом этмоқда.
“Толибон” етакчиси Ҳайбатуллоҳ Охундзода икки йил аввал Афғонистонда гиёҳванд моддалар етиштириш, ишлаб чиқариш ва сотишни тақиқловчи фармон чиқарган эди.
“Толибон” расмийлари Афғонистонда афюн етиштириш тугатилганини бир неча бор даъво қилганди, бироқ улар гиёҳванд моддалар экилган ерлар тозалангани ҳақида хабар беришда давом этмоқда.
Бирлашган Миллатлар Ташкилотининг Гиёҳванд моддалар ва жиноятчилик бўйича бошқармаси ҳам Афғонистонда гиёҳванд моддалар етиштириш 90 фоизга камайганини маълум қилган.
Ушбу бошқарма, шунингдек, гиёҳванд моддалар етиштиришнинг камайиши даромади шунга боғлиқ бўлган қишлоқ деҳқонларини қийин аҳволга солиб қўйганини ва шунинг учун бошқа маҳсулотлар етиштириш жуда муҳимлигини таъкидлаган.
Изоҳ (0)