Марказий банк 2025 йил июль ойи инфляция кўрсаткичлари бўйича таҳлилий инфографика эълон қилди. Таҳлилда қатор товар ва хизматлар нархи ошгани, айримлари арзонлашгани кўрсатилган.

Июль ойида йиллик инфляция даражаси 8,9 фоизи ташкил этган. Мамлакатда Ўзбекистонда 2024 йил июлидан жорий йил июлигача бўлган даврда истеъмол нархлари индекси саватидаги 94 та маҳсулот қиймати 10 фоиздан юқори ошган.
Таҳлил қилинишича, ўтган 12 ой мобайнида озиқ-овқат маҳсулотларидан қўй гўшти 32,9 фоиз, картошка 34,6 фоиз, пахта ёғи 42,6 фоиз қимматлашган. Карам нархи 46,4 фоиз, пиёз 57,8 фоиз, сабзи қарийб 90,2 фоизга ошган. Жами 170 турдаги озиқ-овқат маҳсулотларидан 140 тасининг нархи ўсиши 10 фоиздан паст бўлган.
Ноозиқ-овқат маҳсулотлари туркумида метан нархи энг юқори даражада ўсган — 36,3 фоиз. Ўз навбатида пропан 12,2 фоиз, газета 15,3 фоиз, витаминлар 10,2 фоиз, антибиётиклар 9,7 фоиз қимматлашган. Истеъмол саватидаги 250 турли ноозиқ-овқат маҳсулотларидан 238 тасининг нархи ошиши 10 фоиздан қуйи бўлган.
Маҳаллий ҳаво йўл транспорти 62,3 фоиз, тармоқ газ 39,2 фоиз, суюлтирилган газ таъминоти 25 фоиз, давлат боғчалари 21 фоиз, электр энергияси 18,8 фоиз қимматлашган. Ҳисоб даврида нодавлат боғчалар нархи 7,3 фоиз, меҳмонхона хизматлари 7,6 фоиз, симли интернет 6,1 фоиз ошгани аниқланган. Инфляцияни ҳисоблаш учун инобатга олинадиган 90 турдаги хизматлардан 38 тасининг нархи кўтарилиши 10 фоизга етмаган.
Йил давомида узум кескин арзонлашган — 53,3 фоиз. Шунингдек, помидор (28,2 фоиз), қовоқ (25,6 фоиз), олма (21,4 фоиз) ҳамда гуруч (17,1 фоиз) нархлари нисбатан кўпроқ пасайган.
Аввалроқ Марказий банк Ўзбекистон реал иш ҳақи ошиши бўйича қўшни давлатлардан ортда қолаётганини билдирганди. Шу билан бирга, жорий йилда мамлакатда иш қидириш фаоллиги пасайгани қайд этилган.
Изоҳ (0)