Исроил бош вазири Биньямин Нетаньяхунинг идораси ҲАМАС ҳаракатини Ғазо сектори бўйича битим талабларидан воз кечишда айблади. Бунга жавобан ҲАМАС келишувга амал қилишини таъкидлади.
“ҲАМАС келишувга эришишга тўсқинлик қилувчи инқирозни сўнгги лаҳзада келтириб чиқариб, битимдан воз кечмоқда. ҲАМАС сўнгги дақиқада босим ўтказиш мақсадида воситачилар ва Исроил билан келишилган аниқ шартлардан бош тортмоқда”, дейилади Нетаньяху идорасида.
Исроил бош вазири канселяриясига кўра, воситачилар ҲАМАС битимнинг барча бандларини қабул қилгани ҳақида хабар бермагунча, вазирлар маҳкамаси Ғазо бўйича келишувни тасдиқлаш учун йиғилмайди.
Фаластиннинг ҲАМАС гуруҳи бунга жавобан ўт очишни тўхтатиш тўғрисидаги битимга содиқлигини маълум қилди. Маълумотни ҳаракатнинг юқори мартабали вакили Иззат ал-Рашик тасдиқлади.
Исроил ва ҲАМАС ўртасидаги келишувга кўра, ўт очишни тўхтатиш 19 январдан бошланиши керак. Март ойининг бошигача томонлар гаровга олинганлар ва ҳарбий маҳбусларни алмашади, Исроил қўшинлари чегарага чекинади. Биринчи босқичда гуруҳ Исроилга 33 нафар гаровга олинганларни топшириши кутилмоқда. Иккинчи ва учинчи босқичлар кейинроқ келишиб олинади. ҲАМАС шартларга розилигини билдирган.
Изоҳ (0)