ҲАМАС Дональд Трампнинг махсус вакили Стив Уиткофф томонидан тақдим этилган “кўприк” режасини кўриб чиқмоқда. Al Arabiya хабарига кўра, у Исроил билан сулҳни апрель ойи — рамазон ва пасха байрамларидан кейингача узайтиришни кўзда тутади. Бу давр давомида урушни бутунлай тўхтатиш бўйича музокаралар олиб бориш режалаштирилган.
Шу билан бир вақтда, яҳудий давлати Ғазога қуруқлик, денгиз ва ҳаводан зарбаларини давом эттирмоқда. Биргина 18 март кунининг ўзида 400 нафар фаластинлик ҳалок бўлгани хабар қилинди. Исроил мудофаа вазирининг айтишича, ҳарбийлар ҳужумларни янада кучайтириб, аҳолини анклавнинг жанубий қисмига “эвакуация қилади”. У, шунингдек, жанговар ҳаракатлар “ҲАМАС асирларни тўлиқ озод қилмагунча” ва “бутунлай мағлубиятга учрамагунча” тўхтатилмаслигини таъкидлаган.
Биринчи Синвар Ғазони вайрон қилди, иккинчи Синвар (унинг вориси — таҳ.) эса уни бутунлай йўқ қилади. Тез орада тинч аҳолини жанглар бўладиган ҳудудлардан эвакуация қилиш қайта бошланади, ундан кейин эса янада оғирроқ оқибатлар бўлади — сизлар жавобгарликни тўлиқ ўз зиммангизга оласиз. Гаровдагиларни қайтаринг ва ҲАМАСдан халос бўлинг, акс ҳолда, сизни бутунлай йўқ бўлиш ва ҳалокат кутмоқда, деган вазир Исроил Кац ғазоликларга мурожаат қилиб.
Бу орада Миср ҳам сулҳ борасида ўз таклифини илгари сурди. Режага биноан Исроил қўшинларининг Ғазодан тўлиқ чиқиб кетиши учун аниқ муддат белгиланган бўлиб, АҚШ жараёнга кафиллик қилиши керак.
Гуманитар инқироз чуқурлашмоқда
Исроил аввалига Ғазо аҳолиси учун гуманитар ёрдам киришини тўхтатиб, сўнг ҳужумларни қайта бошлади. Бу эса анклав ҳудудида гуманитар вазиятни оғирлаштирмоқда. БМТнинг фаластинлик қочқинларга ёрдам бериш агентлиги вакилига кўра, ташкилотда бор-йўғи олти кунлик ун захираси қолган.
Бу уруш бошидан бери Ғазога ҳеч қандай ёрдам етказиб берилмаган энг узоқ муддат, дейди UNRWA вакили Сем Роуз.
Исроил ва ҲАМАС ўртасидаги уруш 2023 йил 7 октябрдан буён давом этмоқда. Шундан буён 1200 нафар исроиллик ҳамда 50 мингга яқин фаластинлик ҳалок бўлди. Томонлар келишган сулҳ битимининг 42 кунлик дастлабки босқичи шу ой бошида якунланди. Бироқ Исроил ва ҲАМАС кейинги босқич бўйича келишувга эриша олмагач, яҳудий давлати анклавга тўлиқ блокада жорий қилди. Шунингдек кенг миқёсли ҳарбий ҳаракатларни қайта бошлади.
Изоҳ (0)