Исроил армияси Ғазодаги жангларда тинч аҳолидан жонли қалқон сифатида фойдаланган. Бу ҳақда анклавда бўлган исроиллик аскар CBS News’га маълум қилди. Унинг айтишича, қўмондонлар биноларда портловчи мосламалар бор ёки йўқлигини аниқлаш учун итлар ўрнига фаластинликлардан фойдаланишни буюрган.
“Улар фаластинлик эди. Биз уларни биринчи бўлиб юбордик, бинода портловчи тузоқлар бор-йўқлигини текшириш учун. Улар қўрқиб, титраб туришарди,” деди исми ошкор этилмаслик шарти билан Томми тахаллуси остида интервью берган аскар.
Унинг қўшимча қилишича, мазкур амалиёт армия учун “расмий сиёсат” ва “тизимли жараён” бўлган.
“Биз ҳеч қандай сабаб йўқ бўлса-да, биноларни портлатиб юбордик, бу албатта халқаро қонунларни бузиш. Бундан ташқари, ўзимизни ҳимоя қилиш учун инсонлардан қалқон сифатида фойдаландик,” деган у.
Томмининг айтишича, бу усул ҳарбийлар орасида “чивин протоколи” деб номланади. Унинг сўзларини Исроил армиясининг ҳаракатларини кузатиб борадиган “Breaking the Silence” нодавлат ташкилоти ҳам тасдиқлаб, мазкур амалиёт Ғазода кенг қўлланилаётганини таъкидлаган.
CBS News изоҳ сўраб яҳудий расмийларига мурожаат қилди. Исроил армияси берган жавобда инсонлардан жонли қалқон сифатида фойдаланиш тақиқлангани, аммо Томмининг даъволарини текшириш учун қўшимча маълумот кераклиги таъкидланади.
“Чивин протоколи” Ғазо билан чекланмаган
Исроил сиёсий ва медиа доиралари узоқ йиллардан бери ҲАМАСни фуқаролардан жонли қалқонлардек фойдаланишда айблаб келади. Бироқ CBS News томонидан ўтказилган суриштирувга кўра, Исроил кучлари бу услубдан нафақат Ғазо, балки Ғарбий Соҳилда ҳам фойдаланмоқда.
Телеканалнинг маълум қилишича, Исроил аскарлари Ғарбий Соҳилда 14 ёшли Омри Салем ва унинг 9 ёшли амакиваччасига қурол билан таҳдид қилиб, тўрт қаватли бино ичини текширишга мажбурлаган.
“Жуда қўрқдим, кейин улар бизни дўппослашни бошлашди,” дейди Омри.
Ғазода хизмат қилган Томми эса гувоҳ бўлганлари унга қаттиқ руҳий зарба бўлганини тан олди.
“Мен маънавий жароҳатландим, оддий фуқаролардан итдек инсон қалқони сифатида фойдаланиш — бу жуда жирканч иш”, деди у.
Исроил ва ҲАМАС йил бошида эришилган сулҳнинг кейинги босқичи бўйича компромисс топа олмади. Яҳудий давлати 17 март куни музокаралардан расман чиқиб, Ғоза секторига ҳужумларни қайта бошлади. Исроил расмийлари уларнинг жанговар амалиётлари фақат ҲАМАС аъзоларига қарши қаратилганини иддао қилса-да, тинч аҳолидан қурбонлар сони мисли кўрилмаган даражага етди. Ғазо соғлиқни сақлаш идораларига кўра, 2023 йил 7 октябрдан буён 50 мингдан ортиқ фаластинлик ҳалок бўлган.
Изоҳ (0)