Ғазо секторидаги минглаб фаластинликлар урушни тугатиш талаби билан ҲАМАСга қарши намойишга чиқди. Бу ҳақда Associated Press хабар берди.
Фаластинликлар Ғазо шимолидаги шаҳар вайроналари орасида юриш қилган. Улар Исроил билан 17 ойлик жангни тўхтатишга ва гуруҳни ҳокимиятдан кетишга чақирмоқда. Намойишчилар “халқ ҲАМАСнинг қулашини истайди”, “Йўқолсин ҲАМАС” деб қичқирган. ҲАМАСнинг юқори мартабали амалдори Бассем Наим одамлар норозилик билдириш ҳуқуқига эга экани, бироқ уларнинг эътибори “жиноий тажовузкор” Исроилга қаратилиши кераклигини айтди.
Исроил мудофаа вазири Исроил Кац фаластинликларни намойишларга қўшилишга чақирди.
Сиз ҳам ҲАМАСни Ғазодан олиб чиқиб кетишни ва гаровга олинган барча исроилликларни зудлик билан озод қилишни талаб қилишингиз керак. Бу урушни тўхтатишнинг ягона йўли, деди у.
ҲАМАС тарафдорлари норозилик намойишчиларини сотқинликда айблади.
Фаластинликларни ҲАМАСга қарши намойишга чиқишга Исроил ундаган(ми?)
Wall Street Journal нашрига кўра, яҳудий давлати намойишлар фонида Ғазо аҳолисининг телефонларига “ечим сизнинг қўлингизда ва ҲАМАС сизни дўзахга жўнатишни талаб қилмоқда” деган матнли хабарларни юборган.
ҲАМАС халқимиздан матонатни сақлаб қолишни талаб қилмоқда. Аммо ўлаётганимизда ва қонга беланганимизда, қандай қилиб сабр бардошли бўлишимиз мумкин? ҲАМАС Ғазода содир бўлаётган воқеаларни тўхтатиши керак. Биз бутун дунёга сигнал берамиз: ҲАМАС бошқарувини рад этамиз. Ғазода ҳамма ҲАМАСга ва урушга қарши чиқиши керак, биз бу урушдан тўйганмиз, деган норозилик намойиши иштирокчиларидан бири.
Баъзи намойишчилар Al Jazeera ахборот тармоғини очиқ танқид қилиб, унинг хабарлари ҲАМАС манфаатларига хизмат қилишини таъкидлади. Уларнинг фикрича, телеканал Ғазодаги фаластинликларнинг ҲАМАСни танқид қилаётган ва урушнинг тўхтатилишини истаётган қарашларини етарлича ёритмаяпти.
Исроил Ғазо секторига ҳужумларни қайта тиклаган
Икки ой давом этган ўт очишни тўхтатиш бўйича келишувдан кейин, 18 мартга ўтар кечаси Исроил Ғазога авиазарбалар беришни тиклади. ҲАМАС нишонга олиниши айтилган ҳужумларда 400 дан ортиқ одам ҳалок бўлди, уларнинг аксарияти болалар ва аёллар ҳисобланади. Бундан ташқари, 560 дан ортиқ киши жароҳатланган. Ҳужумни қайта тиклаш буйруғи Исроил бош вазири Биньямин Нетаньяху ва мудофаа вазири Исроил Кац томонидан берилган.
Улар ўт очишни тўхтатиш режимини узайтириш бўйича музокараларда олдинга силжиш йўқлигига жавобан шундай қарор қабул қилганини айтган. Нетаньяху музокараларда олдинга силжиш йўқлиги учун айбни тўғридан тўғри ҲАМАСга юклаган.
Келишувнинг иккинчи босқичи Исроилдан ўз кучларини Ғазодан олиб чиқишни талаб қиларди. Ҳатто 19 январда кучга кирган ва Исроил қамоқхоналаридаги фаластинликлар эвазига гаровдагилар озод этилган биринчи босқичда ҳам Исроил Ғазода 150 дан ортиқ фаластинликни ўлдирди.
Исроил бош вазири Ғазодаги “барча кутилмаган қурбонлар” учун ҲАМАС жавобгар эканини даъво қилган. У Ғазода юзлаб одам ўлимига сабаб бўлган ҳужумлар “фақат бошланиши” эканини таъкидлаган. Бундан ташқари Исроил Ғазода қуруқликдаги операцияни қайта бошлаган. Яҳудий давлати Ғазо секторининг шимолий ва жанубий қисмлари ўртасида буфер зона яратмоқчи.
Изоҳ (0)