15 март куни ҲАМАС Исроил Ғазо секторида ўт очишни тўхтацагина, гаровга олинган 11 киши ва ҳалок бўлган 16 марҳумнинг жасадини қайтаришини маълум қилди. АҚШ расмийларининг фикрича, ҲАМАС “мутлақо амалга ошириб бўлмайдиган” талабларни қўймоқда. Бу ҳақда Al Jazeera хабар берди.
ҲАМАСнинг юқори лавозимли амалдорининг айтишича, Исроил фуқароларини озод қилиш иккинчи босқич музокаралари тугаши билан бошланади. Исроил эса бунга жавобан 50 кундан ортиқ бўлмаган муддат ичида ўт очишни тўхтатиши керак. Шунингдек, Исроил ҲАМАСга гуманитар ёрдам киришига тўсқинлик қилмаслиги ҳамда Ғазонинг Миср билан чегарасидаги стратегик йўлакдан ўз кучларини олиб чиқиши лозим.
Исмини ошкор қилишни истамаган фаластинлик амалдор ҲАМАС гаровга олинганлар эвазига кўпроқ фаластинлик маҳбусларни озод қилишни ҳам талаб қилишини айтди.
ҲАМАСнинг бу мурожаатига Исроил томонидан ҳали муносабат билдирилмаган. Мурожаатдан олдин Исроил бош вазири Биньямин Нетаньяху идораси ҲАМАСни “манипуляция ва руҳий уруш” олиб боришда айблаган.
14 март куни ҲАМАСнинг юқори лавозимли раҳбари Халил ал-Ҳайя музокаралар ўтказиш мақсадида Қоҳирага келган. Ҳозирда Миср ва Қатар Исроилнинг Ғазога ўт очишини тўхтатишга эришишда асосий воситачи вазифасини бажармоқда.
Исроил-ҲАМАС битими
19 январда эришилган ўт очишни тўхтатиш келишувига кўра, Исроил ва ҲАМАС февраль ойи бошида иккинчи босқич бўйича музокараларни бошлаши керак эди. Бунда ҲАМАС узоқ муддатли сулҳ эвазига қолган барча гаровга олинганларни озод қилиши лозим эди, аммо ҳозирга қадар фақат тайёргарлик музокаралари ўтказилди.
Исроил ҲАМАСни янги таклифни қабул қилишга мажбурлаш учун Ғазонинг тахминан 2 миллион фаластинлигига озиқ-овқат, ёқилғи ва бошқа таъминотларни етказиб беришни тақиқлади ҳамда ҳудудга электр энергиясини узиб қўйди.
Изоҳ (0)