Шавкат Мирзиёев “Амирсой”да Садир Жапаров билан норасмий учрашув ўтказди

Шавкат Мирзиёев Тошкент вилоятидаги “Амирсой” курорт мажмуасида Садир Жапаров билан норасмий учрашув ўтказди, деб хабар бермоқда Президент матбуот хизмати.

Маълум қилинишича, 25 январь куни Қирғизистон президенти ташриф билан Ўзбекистонда бўлди. Учрашувда етакчилар икки томонлама муносабатларнинг долзарб масалалари, шунингдек, халқаро сиёсат ва минтақавий ҳамкорлик юзасидан фикр алмашди.

Қирғизистон президенти тоғ-чанғи мажмуасида яратилган шароитлар ва унинг жаҳоннинг юксак стандартларига мос замонавий инфратузилмасини юқори баҳолади.

Ўзбекистон ва Қирғизистонда икки мамлакатнинг ноёб геоландшафти ва хилма-хил табиатини ҳисобга олган ҳолда курорт-рекреация марказларини ташкил этишга қаратилган қўшма лойиҳаларни илгари суришга келишиб олинди.

Қирғизистон президенти “Амирсой” тоғ-чанғи курортини кўриб ҳайратга тушганини, хизмат кўрсатиш даражаси Еввропаникидан кам эмаслигини айтди.

“Ҳамкасбим Шавкат Мирзиёев бу юқори даражадаги базани нолдан бошлаб қурди. Гап йўқ, баракалла”, деб ёзди у Facebook’даги саҳифасида.

Шунингдек, ҳудудининг 94 фоизини тоғлар эгаллаган Қирғизистонда бундай тоғ-чанғи курортлари нега йўлигига тўхталиб ўтди.

“Чунки мустақилликка эришганимиздан буён оддий халқдан тортиб, президентларгача фақат сиёсат билан шуғулланиб келдик. Ҳар куни митинглар бўлди, ҳар куни тўй. Иқтисодиёт, туризм ва бошқа муҳим соҳаларга эътибор қаратилмади”, деди у.

2024 йил февралида Беларусь президенти Александр Лукашенко ҳам Шавкат Мирзиёев билан бирга “Амирсой” тоғ дам олиш масканига ташриф буюрганди. Давлат раҳбарлари спортчилар ва сайёҳлар учун яратилган шароитлар билан танишиб, икки мамлакат ўртасидаги туризм алмашинувини кенгайтириш юзасидан фикр алмашганди. Шунингдек, етакчилар тоғ-чанғи трассасида биргаликда чанғи учганди.

Сўнгги йилларда Бўстонлиқда кўплаб янги мажмуалар барпо этилди, “Амирсой”дан ташқари, “Белдирсой-Чимён-Нанай” курорти каби лойиҳа ҳам амалга оширилди. Хусусан, сўнгги беш йилда 2 триллион сўмдан зиёд инвестиция киритилиб, 13 мингдан зиёд ўринга эга 59 та янги туризм иншооти ишга туширилди.

Бундай натижалар чет эллик инвесторларни ўзига тортмоқда, янада катта миқёсдаги лойиҳаларга йўл очмоқда. Жумладан, озарбайжонлик ишбилармон Эмин Агаларов бир қатор йирик хорижий компаниялар билан шерикликда Чорвоқ сув омбори бўйида Sea Breeze Uzbekistan халқаро туризм маркази барпо этиш истагини билдирган.

2024 йил декабрида Шавкат Мирзиёев Бўстонлиқ туманида ташкил этилаётган янги туризм масканини кўздан кечирганди. У ерда зарур инфратузилма яратилиб, капсула шаклидаги уйлардан иборат замонавий дам олиш маскани барпо этилмоқда. Шунингдек, ресторанлар, дор йўллари ва чанғи учиш майдонлари бўлади.