Қирғизистон президенти Садир Жапаров воизларнинг уйма-уй юришини тақиқловчи қонунни имзолади.
Республика раҳбарининг айтишича, бу масала жуда баҳсли ҳисобланади. Диний қоидаларга эргашувчилар Жапаровдан қонунни эътироз билдирган ҳолда рад этишни сўрашган бўлса, жамиятнинг бошқа қисми эса уни имзолашни қатъий талаб қилган.
“Жамият аъзолари нотаниш одамларнинг хонадонма-хонадон юриб, эшикларни тақиллатишига қарши. Улар бу кезиб юрган тарғиботчилар ким эканлиги, уларнинг гувоҳномаси бор-йўқлиги, қандай ташкилот ёки йўналишни тарғиб қилаётгани ва бу бизнинг динимизга зид эмаслигини билишни истайдилар”, дейди у.
Жапаровнинг айтишича, тарғибот учун уйма-уй юришлар масаласи ҳали тўлиқ тартибга солинмаган. Хусусан, бундай юришларга ким рухсат бериши, уларда кимлар қатнашиши мумкинлиги, қандай маълумот талаб этилиши, қандай варақалар ёки китобларни тарқатиш мумкинлиги аниқланмаган.
Ҳозирда Қирғизистонда миссионерлик фаолиятига айрим жойларда, масалан, масжидларда, бозорларда рухсат берилган. Жапаров кейинчалик уйма-уй юришларга ҳам рухсат берилиши мумкинлигини, бироқ бунинг учун аниқ қоидалар ишлаб чиқилиши зарурлигини таъкидлади.
“Мен бу масалага оддий фуқаро сифатида эмас, балки мамлакат президенти сифатида ёндашяпман. Биз фақат бугунги кун ёки шахсий манфаатларимиз учунгина яшамаслигимиз керак”, дея қўшимча қилди Қирғизистон раҳбари.
Бундан ташқари, президент жамоат жойларида юзни тўлиқ беркитадиган диний кийимларни кийишни тақиқловчи қонунни имзолади. Ҳужжатга кўра, давлат ҳокимияти органлари муассасаларида ва жамоат жойларида фуқаронинг шахсини аниқлаш имконини бермайдиган кийимни кийганлик учун жавобгарлик белгиланган. Меҳнат ва хизмат фаолияти билан боғлиқ ёки тиббий кўрсатмаларга кўра юзни ёпадиган кийимлар бундан мустасно. Шунингдек, қонун психологик ёки жисмоний зўрлик йўли билан динга мажбурлашни, қариялар уйида, ҳарбий қисмларда ёки жазони ижро этиш муассасаларида диний маросимларни ўтказишни тақиқлайди.
Жапаров сиёсий партияларни диний асосда тузишни ҳам ман этди. Ҳужжат партияларнинг тарғибот кампанияларида диний жиҳатлардан фойдаланишни ва сиёсий кучларни “хорижий давлатларнинг юридик ва жисмоний шахслари, шунингдек, диний ташкилотлар” томонидан молиялаштиришни тақиқлайди. Янги қонун “фуқаролар ва диний бирлашмаларнинг ўз фаолиятидаги масъулиятини белгилаш” ҳамда бир қатор қонун ҳужжатларини “Дин эркинлиги ва диний бирлашмалар тўғрисида”ги қонунга мувофиқлаштириш мақсадида ишлаб чиқилган ва қабул қилинган.
Изоҳ (0)