Қирғизистон президенти Садир Жапаров интернетда ҳақорат ва туҳмат учун жарималар тўғрисидаги қонунни имзолади. Ҳужжат Эркин-Тоо газетасида эълон қилинган.
Ҳужжат ўн кундан кейин кучга киради. Дастлаб у туҳмат ва ҳақорат учун жисмоний шахсларга 100 минг сом, юридик шахсларга эса 200 минг сом жарима солишни таклиф қилганди.
Бироқ узоқ муҳокамалардан сўнг жарима миқдори жисмоний шахслар учун 20 минг сомгача, юридик шахслар учун 65 минг сомгача камайтирилди. Бунда инстернетдаги нима туҳмат ёки ҳақорат эканини Маданият вазирлиги ўрнига ҳуқуқни муҳофаза қилиш органлари ҳал қилади.
ОАВ ва интернетда ҳақорат ва туҳмат учун жарималар жорий этиш тўғрисидаги қонун лойиҳаси Маданият вазирлиги ташаббуси билан ишлаб чиқилган. Ҳужжат муаллифлари маълумотларига кўра, сўнгги пайтларда “оммавий ахборот воситалари ва интернет ресурслари орқали тарқатилаётган ҳақорат ва камситиш ҳолатларининг кўпайиши кузатилмоқда”.
Садир Жапаров муносабати
Қирғизистон президенти 2024 йил 28 сентябрда тегишли қонун нима учун муҳимлиги ва уни қўллаб-қувватлаши борасида шундай деганди:
Бу қонун нима учун керак? Айни пайтда фуқароларимизнинг қарийб 95 фоизи интернетдан фойдаланмоқда. Ҳозир шундай вақтки, ҳатто икки қўшни ҳам интернет орқали жанжаллашиши мумкин. Бири ижтимоий тармоқларда бошқасининг обрўсига путур етказадиган маълумотларни эълон қилади. Натижада улар судлашишни бошлайдилар. Маълумот эса ёлғон бўлиб чиқади. Судда кечирим сўрашади ёки товон тўлашади ва шу билан тинчланишади.
Худди шундай вазият ОАВ ва ҳокимият ўртасида ҳам юзага келади. Оммавий ахборот воситалари ҳокимият тепасида турганлар ҳақида ёлғон маълумотлар тарқатади, кейин эса кечирим сўраб, бу маълумотларни ўчириб ташлайди, деган эди сиёсатчи.
Изоҳ (0)