Global Firepower ташкилотининг 2025 йилги ҳисоботига кўра, Ўзбекистон мудофаа бюджети бўйича Марказий Осиё давлатлари орасида биринчи ўринни эгаллаб, 2,8 миллиард АҚШ долларини ташкил этмоқда.
Ундан кейинги ўринларни Қозоғистон (2 миллиард АҚШ доллари) ва Туркманистон (1,1 миллиард АҚШ доллари) мудофаа харажатлари билан эгаллаган. Энг кам мудофаа харажатлари Қирғизистонда (221,8 миллион АҚШ доллари) ва Тожикистонда (446 миллион АҚШ доллари) кузатилмоқда.
Халқаро стратегик тадқиқотлар институти (IISS) маълумотларига кўра, жаҳон мудофаа харажатлари бир йил ичида 2023 йилдаги 2,24 триллион АҚШ долларидан 2024 йилда 2,46 триллион АҚШ долларигача ошган.
Дунёдаги энг йирик ўн бешта мудофаа бюджети 2 триллион АҚШ долларидан сал камроқ маблағни жамлайди, шундан 968 миллиард АҚШ доллари, деярли ярми, фақат АҚШ ҳисобига тўғри келади.
Қолган ўн тўртта давлатнинг умумий мудофаа бюджети 1 триллион АҚШ долларидан сал кўпроқни ташкил этади.
Ҳарбий харажатлар бўйича иккинчи ўринни Хитой (235 миллиард АҚШ доллари), учинчи ўринни эса Россия (145,9 миллиард АҚШ доллари) эгаллайди. Бироқ харид қобилияти паритетини ҳисобга олган ҳолда, Хитойнинг тузатилган мудофаа бюджети 477 миллиард АҚШ долларини, Россияники эса 461 миллиард АҚШ долларини ташкил этади.
Изоҳ (0)