ҲАМАС Исроилнинг Ғазо секторига электр энергияси етказиб беришни тўхтатиш тўғрисидаги қарорини “арзон шантаж” ва ўт очишни тўхтатиш бўйича эришилган келишувни “қўпол бузиш” деб баҳолайди. Бу ҳақда ҳаракатнинг сиёсий бюро аъзоси Иззат ар-Ришқ ўзининг Telegram каналидаги баёнотида маълум қилган.
“Биз босқинчиларнинг Ғазо секторини озиқ-овқат, дори-дармон ва сувдан маҳрум қилгандан кейин электр таъминотини ўчириб қўйиш қарорини кескин қоралаймиз”, дея таъкидлаган ар-Ришқ ўзининг баёнотида.
Шунингдек, ушбу ҳаракатни “халққа босим ва қаршилик кўрсатиш ҳамда арзон ва қабул қилиб бўлмайдиган шантаж сиёсати орқали амалга оширишга бўлган умидсиз уриниш”, деб атаган.
Исроил электр энергетика компаниясининг маълумотларига кўра, Ғазо секторининг барча ҳудудларида ҳозирда электр таъминоти мавжуд эмас. Сўнгги вақтларда бу ҳудудларга фақат канализация тизимини ишлатиш учунгина электр энергияси етказиб берилаётган эди.
Times of Israel нашри исроиллик амалдорга таяниб хабар беришича, узиб қўйиш фақат битта чучуклаштириш станциясига - Ғазо секторидаги Исроилдан электр узатиш линиясига уланган ягона иншоотга таъсир қилади.
Якшанба куни кечқурун Исроил энергетика вазири Эли Коэн Ғазо секторига электр энергияси етказиб беришни зудлик билан тўхтатишни буюрганди.
Изоҳ (0)