Озарбайжон ва Арманистон тинчлик битими матнини келишиш бўйича музокараларни якунлади. Бу ҳақда 13 март куни Озарбайжон ташқи ишлар вазири Жайхун Байрамов журналистларга маълум қилган.
Унинг айтишича, Арманистон Озарбайжон томонининг битимнинг сўнгги келишилмаган икки банди бўйича таклифларини қабул қилган.
“Кейинги босқичда Бокунинг кутганидек, Арманистон ўз конституциясига ўзгартиришлар киритиши лозим, чунки унда ҳали ҳам Озарбайжонга нисбатан ҳудудий даъволар мавжуд”, деди вазир XII Глобал Боку форуми доирасида.
News.аm нашрининг хабар беришича, Арманистон Республикаси Ташқи ишлар вазирлиги ҳам “Арманистон Республикаси ва Озарбайжон Республикаси ўртасида тинчлик ва давлатлараро муносабатларни ўрнатиш тўғрисида”ги битим лойиҳаси бўйича келишувга эришилганлигини ва ушбу лойиҳа бўйича битим юзасидан музокаралар якунланганлигини тасдиқлаган.
Икки мамлакат вакиллари битимни имзолаш муддати ва жойи бўйича маслаҳатлашувларни бошлашга тайёр эканликларини айтишган.
Аввалроқ Қирғизистон президенти Садир Жапаров ва Тожикистон президенти Эмомали Раҳмон икки мамлакат ўртасидаги Давлат чегараси тўғрисидаги битимни имзолагани хабар берилганди.
Изоҳ (0)