Арманистон ҳукумати Россия раҳбариятига мурожаат қилиб, Туркия ва Эрон билан чегарани қўриқлашда ёрдам беришни сўраган. Бу ҳақда Россия Федерал хавфсизлик хизмати тарқатган маълумотга асосланиб, “Интерфакс” нашри хабар берди.
Россия Федерацияси Федерал хавфсизлик хизмати директори лавозимига номзод Александр Бортниковнинг маълум қилишича, Арманистон томони Россиядан мамлакат ҳудудида чегарачиларнинг мавжудлигини сақлаб қолишни сўраган. Бунга асос сифатида жанубий ва ғарбий чегара ҳудудларида хавф даражаси сақланиб қолаётганини келтирган.
“Арманистонда чегарачиларимизни сақлаб қолмоқдамиз. Арманистонлик ҳамкорларимиз биздан Туркия ва Эрон билан чегарани қўриқлаш бўйича функсионал мажбуриятларни бажаришни давом эттиришимизни сўрашмоқда”, — деган Бортников.
Россия расмийсига кўра, арман томони Россия ҳукуматидан Звартноц халқаро аэропортидаги чегара назорат пунктини ёпишни ҳам илтимос қилган. Россия яқин келажакда буни амалга оширишни режалаштирганини билдирган.
Россия ҳукумати чегара хизмати тезкор гуруҳларини Арманистон-Озарбайжон чегарасидаги демаркация чизиғидан олиб чиқиш тўғрисида қарор қабул қилинганини маълум қилган. Бу қарор билан Боку ва Ереван ўртасида жойлаштирилган рус ҳарбий контингентлари ҳудуддан тўлиқ олиб чиқилиши кафолатланган.
“Арманистон томони вақтинчалик тезкор гуруҳларни чегара чизиғидан олиб чиқиб кетишни ва ҳеч қандай тарзда қонуний белгиланмаган ҳудудларда аскарлар бўлиши муаммосини ёпишни сўради”, — деган Бортников Федерация Кенгашида ўтказилган йиғилишда.
Ушбу тўғрисидаги қарор 8 май куни Москвада Арманистон бош вазири Никол Пашинян ва Россия президенти Владимир Путин ўртасидаги учрашувда келишилгани маълум қилинган. Келишув якунлари бўйича амалий ҳаракатларга киришилиши билдирилган.
Изоҳ (0)