Озарбайжон Мудофаа вазирлиги Арманистон ва Францияни Жанубий Кавказ минтақасида конфликтни авж олдиришда айблади. Бу ҳақда “Haqqin.аz” хабар берди.
Вазирлик баёнотига кўра, Франция огоҳлантиришларга қарамай, Арманистонни ҳалокатли артиллерия ва бошқа қуроллар билан таъминлашда давом этмоқда.
“Франциянинг Арманистонни ҳалокатли ва ҳужумкор артиллерия тизимлари ва бошқа турдаги қуроллар билан таъминлаши Жанубий Кавказ минтақасидаги провокацион фаолиятининг яна бир далилидир”, — дейилади баёнотда.
Икки давлат ўртасида Caesar ўзиюрар артиллерия тизимларини сотиб олиш бўйича имзоланган шартнома буни тасдиқлаши таъкидланган.
“Арманистонни ҳалокатли қуроллар билан таъминлаш бўйича жорий ҳарбий келишув Франция раҳбарияти иккиюзламачилигининг яна бир кўринишидир”, — деди Озарбайжон Мудофаа вазирлиги.
Шунингдек, вазирлик Парижни Арманистон ва Озарбайжон муносабатларининг нормаллашувига тўсқинлик қилаётганликда айблаб, Франция сиёсатини “милитаризация ва геосиёсий интрига” деб атади.
“Макрон режими Жанубий Кавказ минтақасида ҳарбийлаштириш ва геосиёсий интрига сиёсатини олиб борар экан, Арманистон ва Озарбайжон ўртасидаги муносабатларнинг нормаллашувига ва минтақада барқарор тинчликка тўсқинлик қилмоқда”, — дейилади баёнотда.
Вазирлик Франция Арманистонни қуроллантириш орқали “сиёсий жавобгарликсиз янги урушга йўл очаётгани”ни таъкидлади.
“Франция колониал империя сифатида дунёнинг турли бурчакларида уруш ва можаро ўчоқларини яратиш бўйича бой тажрибага эга, бу жирканчлик. Янги Каледония ва бошқа колониал ҳудудларида содир бўлаётган жараёнлар, маҳаллий халқларнинг эксплуатацияси, табиий бойликларининг талон-тарож қилиниши, ирқчилик сиёсати натижасида бу ҳудудларнинг демографик таркибининг ўзгариши, норозилик намойишларини куч ишлатиш ёки қурол билан бостириш — буларнинг барчаси Макрон режимининг асл моҳиятидан далолат беради.
Арманистоннинг реваншист раҳбарияти ва Макрон диктатураси Жанубий Кавказ минтақасида вазиятнинг кескинлашуви ва янги уруш ўчоғининг пайдо бўлиши учун тўлиқ жавобгарликни ўз зиммасига олишини маълум қиламиз”, — дейилади Мудофаа вазирлиги баёнотида.
Изоҳ (0)