Тоғли Қорабоғда оташкесим эълон қилинди: армия тарқатиб юборилади, арман қўшинлари олиб чиқилади

Тан олинмаган Тоғли Қорабоғ республикаси (Artsах) расмийлари 20 сентябрь куни маҳаллий вақт билан соат 13:00 дан (Тошкент вақти билан 14:00) ўт очишни тўлиқ тўхтатиш бўйича келишувга эришилганини маълум қилди, деб ёзмоқда “Интерфакс”.

Келишув доирасида, Тоғли Қорабоғда қолган арман ҳарбийлари минтақадаги “Россия тинчликпарвар контингенти жойлашган зонадан” олиб чиқилади, тан олинмаган республиканинг қуролли бўлинмалари тарқатиб юборилади ва оғир техникалар олиб кетилади.

Тан олинмаган республика расмийларининг таъкидлашича, бундай келишувга “Тоғли Қорабоғда жойлашган Россия тинчликпарвар контингенти қўмондонлиги воситачилигида” эришилган.

21 сентябрь куни Евлах шаҳрида Тоғли Қорабоғнинг арман аҳолиси вакиллари ва Озарбайжон ҳукумати вакиллари ўртасида учрашув бўлиб ўтиши режалаштирилмоқда.

Унда “Озарбайжон томонидан кўтарилган реинтеграция, Тоғли Қорабоғ арманларининг ҳуқуқлари ва хавфсизлигини таъминлаш масалалари, шунингдек, Озарбайжон Конституцияси доирасида Тоғли Қорабоғ аҳолисининг турмуш тарзини таъминлаш масалалари муҳокама қилинади”, деди республика расмийлари.

Озарбайжоннинг Тоғли Қорабоғдаги операциясида 32 киши ҳалок бўлди

Тоғли Қорабоғда Озарбайжоннинг “анксилтеррор тадбирлари” бошланганидан бери 32 киши ҳалок бўлди, 200 дан ортиқ киши жароҳатланди, деди тан олинмаган республикасидаги Инсон ҳуқуқлари бўйича комиссар Гегам Степанян.

Унинг сўзларига кўра, ҳалок бўлганлар орасида етти нафар тинч аҳоли вакили, жумладан, икки нафар бола ҳам бор. Яна 35 нафар тинч аҳоли, жумладан, 13 нафар бола яраланган.

Шу билан бирга, Тоғли Қорабоғ ҳукуматининг собиқ раҳбари Рубен Варданян Reuters агентлигига берган изоҳида, минтақада жанговар ҳаракатлар бошланганидан бери 100 га яқин одам ҳалок бўлгани, яна юзлаб одамлар жароҳатланганини айтган.

Эслатиб ўтамиз, 19 сентябрь куни Озарбайжон Тоғли Қорабоғда “конституциявий тузумни тиклаш” мақсадида “маҳаллий аксилтеррор чоралари” бошланганини эълон қилди ва тан олинмаган республика ҳудудини ўққа тута бошлади. Бу арман томонининг провокациялари, жумладан, Аҳмадбейли—Фузули—Шуша трассасида автомобиль портлаши оқибатида полиция ходимларининг ҳалок бўлиши билан изоҳланган.

Озарбайжон Мудофаа вазирлиги арманистонлик аскарлар томонидан ўрнатилган миналарнинг портлаши оқибатида етти нафар озарбайжонлик ҳарбий ҳалок бўлганини маълум қилган. Пашинян Тоғли Қорабоғда “ҳарбий операция” ўтказиш учун Арманистон ҳеч кимга мандат бермаганини айтган.