Арманистон Озарбайжон билан тинчлик шартномасини тузиш учун Конституцияни ўзгартиришга тайёр. Бу ҳақда Арманистон бош вазири Никол Пашинян Ню-Ёркда бўлиб ўтган БМТ бош ассамблеяси йиғилишида маълум қилди.
Унинг сўзларига кўра, агар Арманистон ва Озарбайжон ўртасида тинчлик шартномаси тузилса, бу ҳужжат мамлакат Асосий қонунига мувофиқлигини текшириш учун Арманистон Конституциявий судига (КС) юборилади.
“Агар Конституциявий судимиз келишув Арманистон Конституциясига зид деб қарор қилса, шунга қарамай, бу ҳолатда биз тинчлик ўрнатиш учун конституциявий ўзгаришлар зарур бўлган аниқ вазиятга дуч келамиз. Агар Конституциявий суд шартномани Конституцияга мувофиқ деб топса, ҳужжатни ратификация қилишда ҳеч қандай тўсиқ бўлмайди”, деб тушунтирди Пашинян.
Аввалроқ Пашинян 11-22 ноябрь кунлари Бокуда бўлиб ўтиши режалаштирилган БМТ иқлим конференциясигача Арманистон Озарбайжон билан тинчлик шартномасини имзолашга тайёрлигини маълум қилганди.
Тоғли Қорабоғ можароси
Озарбайжон тинчлик режасининг бир қисми сифатида Арманистон Конституцияга ўзгартириш киритишни талаб қилмоқда. Арманистон Асосий қонунининг 1-бандида мамлакат Олий кенгаши томонидан 1990 йил 23 августда қабул қилинган Мустақиллик декларациясига ҳавола мавжуд. Ушбу декларациянинг бошида, ўз навбатида, Арманистон ССР ва Тоғли Қорабоғнинг 1989 йилдаги “Бирлаштириш тўғрисида”ги қўшма қарорига ишора қилинган.
“Уларнинг Конституциясидаги ушбу банд билан бу мумкин эмас, чунки Конституция бошқа ҳар қандай ҳужжатдан, шу жумладан халқаро шартномадан ҳам устундир. Шундай экан, бир кун келиб улар ўз фикрини ўзгартириб, сентябрда қилган ишимизни яна қилишимиз керак бўладиган вазиятга тушиб қолишни истамаймиз”, дея Озарбайжон президенти Илҳом Алиев ўз давлатининг позициясини тушунтирган.
Бундан олдин Алиев Ереван ўз конституциясига ўзгартиришлар киритиши кераклигини бир неча бор таъкидлаган эди.
Изоҳ (0)