Қашқадарё вилояти Деҳқонобод тумани ҳокимлиги 14—24 декабрь кунлари картошка сотиб олиш бўйича бошланғич нархи 189 миллион 750 минг сўм бўлган тендер ўтказган. “Дарё” мухбири лот маълумотларини кўздан кечириш жараёнида буюртмачи ва ғолиб ўртасида боғлиқлик борлигини аниқлади.
Платформада жойланган, ҳокимнинг биринчи ўринбосари – харид комиссияси раиси У.Усмонов имзолаган ҳужжатда, маҳаллий бюджет маблағлари ҳисобидан “Туман ички бозорида нархларнинг барқарорлигини сақлаш ва аҳолини асосий турдаги озиқ-овқат маҳсулотлари захирасини ташкил этиш учун” 34500 килограмм картошка сотиб олиш белгиланган. Ғолиб 90 кун муддатда маҳсулотни етказиб бериши керак. Таклиф қилинган бошланғич нархи 189 миллион 750 минг сўм.
Тендер жорий йил 14 ноябридан 23 декабрига қадар муддатда ўтказилган ва баённома расмийлаштирилган.
Лотни ютиб олиш учун иккита – асосий улушдор ҳокимлик бўлган “Деҳқонобод” деҳқон (озиқ-овқат) бозори масъулияти чекланган жамияти ва “Афсона Тиме” хусусий корхонаси рақобатлашган. Икки иштирокчи ҳам 186 миллион 300 минг сўм таклиф қилган.
Якуний натижага кўра, 95,8 балл билан “Деҳқонобод” деҳқон бозори ғолиб деб топилган. Баённомага 5 нафар комиссия аъзоларининг уч нафари розилигини билдирган.
Эътиборли жиҳати, тендерда иштирокчиларни банк, солиқ ва бошқа мажбурий тўловлардан қарздорлиги мавжуд эмаслиги мезони бўйича баҳолашда харид комиссияси “Деҳқонобод” деҳқон бозорига 23 балл, хусусий корхонага эса 22 балл қўйган.
Ваҳоланки, бозорнинг 24 декабрь ҳолатига МИБ ижросида бўлган 714 минг сўмлик қарзи бор эди. (Ҳозирда бу қарздорлик бартараф этилган). Хусусий корхонанинг қарздорлиги эса мавжуд эмас.
Бундан кўриниб турибдики, тендерни ўтказиш жараёнида харидларни амалга оширишда рақобат муҳити бузилган ёки манфаатлар тўқнашувига йўл қўйилган бўлиши мумкин.
Изоҳ (0)