“Деҳқонобод калий заводи” акциядорлик жамияти тендер ўтказгани, унда харид комиссияси аъзолари томонидан “Давлат харидлари тўғрисида”ги қонун талаблари бузилганига ҳақида хабар берилганди. Жамият матбуот хизмати ушбу ҳолат юзасидан муносабат билдирди.
Таъкидланишича, 2025 йил ишлаб чиқариш эҳтиёжи учун аутсорсинг асосида юк ташиш хизматини кўрсатувчи ташкилотни танлаш бўйича тендер ҳужжатига 2024 йилнинг 21 ноябрь куни Иқтисодиёт ва молия вазирлиги ҳузуридаги “Лойиҳалар ва импорт контрактларини комплекс экспертиза қилиш маркази” давлат унитар корхонасидан хулоса олинган.
“Олинган хулоса бўйича дастлаб 2024 йилнинг 26 ноябрь кунида 24121006402455-сонли лот асосида савдога қўйилган. Савдо жараёни 2024 йил 14 декабрь куни якунланган. Келиб тушган таклифларни баҳолаш жараёнида ушбу корхоналардан тақдим қилинган ҳужжатларда камчиликлар бўлгани сабабли лот дисквалификация деб топилган ва тизим томонидан савдо жараёнида ғолиб аниқланмаган.
Шу сабабли ушбу тендер ҳужжати 2-маротаба 2024 йил 18 декабрь куни 24121006407846-сонли лот асосида савдога қўйилган. Савдо жараёни 2025 йил 8 январь кунида якунланган ва электрон тизим (etender.uzex.uz) томонидан Ўзбекистон республикаси президентининг 2024 йил 10 июлдаги ПҚ-249-сонли қарори 5-банди 5-хат бошига (тендер савдоларида битта тадбиркорлик субъекти иштирок этган тақдирда, давлат буюртмачиси харид қилиш тартиб-таомилини ҳамда товарларга (ишларга, хизматларга) оид мезонларни ўзгартирмаган ҳолда такроран эълон жойлаштирганда ва такрорий тендер савдоларининг ягона иштирокчиси илгари иштирок этган тадбиркорлик субъекти бўлганда, тендер савдолари ўтказилган деб ҳисобланади) асосан келиб тушган таклиф автоматик тарзда баҳолаш жараёнига ўтказилиб, 2025 йил 9 январда харид комиссиясининг электрон баённомаси расмийлаштирилган. Шу билан бирга, Ўзбекистон Республикаси Коррупцияга қарши курашиш агентлигининг 2025 йил 10 январдаги тақдимномасига асосан харид комиссияси баённомаси бекор қилинган”, дейилади муносабатда.
Қайд этилишича, келгусида шунга ўхшаш ҳолатларни юзага келишини олдини олиш мақсадида, ўтказилган тендер савдоси бўйича ҳужжатларни “Давлат харидлари тўғрисида”ги қонун принципларига мослигига ойдинлик киритиш мақсадида ваколатли органларга мурожаат юборилган.
Бундан ташқари, шу кунга қадар “Деҳқонобод калий заводи” АЖ томонидан амалга ошириладиган барча савдо жараёнлари Ўзбекистон Республикасининг “Давлат харидлари тўғрисида”ги ЎРҚ-684-сонли қонунининг асосий принциплари асосида амалга ошириб келинаётганини маълум қилинган.
Изоҳ (0)