Акциядорлик тижорат Халқ банки 13–19 декабрь кунлари бошланғич нархи салкам 626 млн сўмлик қурилиш бўйича тендер ўтказган. “Дарё” мухбири лот маълумотларини кўздан кечириш жараёнида комиссия аъзолари ғолибга ён босганини аниқлади.
Платформага жойланган техник топшириқ ҳужжатида Халқ банкининг Қумқўрғон тумани “Янги шаҳар” маҳалласида жойлашган филиали учун ижарага олинган биноларни жорий таъмирлаш белгиланган. Таъмирлаш ишлари шартнома имзолангандан бошлаб 30 иш кунида тугалланиши кўрсатилган. Ушбу хизмат учун таклиф қилинган бошланғич нархи 625 миллион 499 минг 652 сўм сўм этиб белгиланган.
Ҳужжат Халқ банки Сурхондарё вилоят минтақавий маркази бошлиғи Асқар Юлдашев имзолаган. У бир вақтнинг ўзида тендер харид комиссияси раиси ҳам ҳисобланади.
Тендер жорий йил 13–19 декабрь оралиғида ўтказилган. Баённома 23 декабрь куни расмийлаштирилган. Шартнома эса 27 декабрь куни имзоланган.
Лотни ютиб олиш учун бешта — “Сурхон келажактранс”, “Турон замин”, “Диёрбек идеал сервис қурилиш”, “Тошкент—Термиз қурилиш” масъулияти чекланган жамиятлари ҳамда “Жавоҳир Аслиддин” хусусий корхонаси рақобатлашган.
Якуний натижага кўра, 92.70968 балл билан “Тошкент-Термиз-қурилиш” МЧЖ ғолиб деб топилган. “Турон замин” МЧЖ эса 92.70949 балл билан захира ғолиб сифатида кўрсатиб ўтилган. Баённомага 5 нафар комиссия аъзоларининг барчаси розилигини билдирган.
Баённома билан танишиш давомида Иштирокчининг қурилиш-пудрат ташкилотлари электрон рейтингидаги кўрсаткичи мезони бўйича баҳолашда харид комиссияси аъзолари ғолибни нотўғри баҳолагани аниқланди.
Баҳолашда электрон рейтингда ССС ва ундан юқори кўрсаткичи учун – 3 балл, С ёки СС кўрсаткичи учун – 2 балл, DDD кўрсаткичи учун эса — 1 баллдан баҳоланиши белгиланган.
“Тошкент-Термиз-қурилиш” МЧЖ рейтингда DDD кўрсаткичига эга бўлса-да, баҳолаш жараёнида рейтинг кўрсаткичи илова қилиниши, 1 та С кўрсаткичга эга эканлиги айтилиб, унга 2 балл берилган. Ваҳоланки, харид комиссияси аъзолари аввалги тендерларда ушбу жамиятнинг рейтинг кўрсаткичини 1 баллдан баҳолашган.
Бундан ташқари, амалдаги тартиб-қоидаларга кўра, ғолиб иштирокчи давлат буюртмачиларида лойиҳаларни амалга оширгани ҳақидаги шартномалар, қурилиш объектини кўздан кечирганлик тўғрисидаги буюртмачи томонидан тасдиқланган маълумотнома (далолатнома ва расм), доимий ишловчи ходимларнинг ҳужжатлари ва электрон меҳнат дафтарчалари, банк маълумотномаси илова қилиши шарт. Бироқ ўрганишимиз давомида “Тошкент-Термиз-қурилиш” МЧЖ томонидан юқоридаги ва бошқа ҳужжатлар белгиланган муддатларда тақдим этилмагани аниқланди.
Шундай бўлса-да, харид комиссияси “Тошкент-Термиз-қурилиш” масъулияти чекланган жамиятини тендердан четлатиш ўрнига уни сунъий равишда юқори баҳолаб, ғолиб деб топган. Бу орқали харид комиссияси аъзолари қатор қўпол қонунбузилишларга йўл қўйган. Буни баённома ва мазкур тендерга оид бошқа ҳужжатлар тасдиқлаб турибди.
Маълумот учун, Акциядорлик тижорат Халқ банки 1995 йилда давлат рўйхатидан ўтказилган бўлиб, улушининг 77.60 фоизи Ўзбекистон Республикаси тикланиш ва тараққиёт жамғармасига, 22.40 фоизи Молия вазирлигига тегишли. Яъни банк давлат тасарруфидаги муассаса ҳисобланади.
“Дарё” масъуллардан ушбу шубҳали тендер натижаларига эътибор қаратиб, ноқонуний ҳолатлар бўйича тегишли чора кўришни сўрайди.
Изоҳ (0)